पणजी : बांबोळी येथील गोमेकॉत रुग्णांना उत्कृष्ट सेवा देण्याच्या उद्देशाने रुग्णांच्या आहारात महत्त्वपूर्ण बदल करण्यात आले आहेत. रुग्णांच्या आरोग्याला आणि पोषणाला केंद्रस्थानी ठेवण्यात आले असून नव्या उपक्रमांतर्गत रुग्णालयात जेवणासाठी वापरल्या जाणाऱ्या स्टीलच्या प्लेट्सची जागा आता झाकण असलेल्या 'कॅम्ब्रो प्लेट्स'ने घेतली आहे. याशिवाय रुग्णांच्या दुपारच्या जेवणात दह्याचा समावेश करण्यात आला असून, यामुळे आहारातील पोषणाचा दर्जा सुधारण्यास मदत होणार आहे.
आरोग्यमंत्री विश्वजित राणे यांनी या धोरणात्मक बदलांविषयी माहिती देताना सांगितले की, रुग्णालयात दाखल असलेल्या प्रत्येक रुग्णाला योग्य आणि पौष्टिक आहार मिळणे उपचाराचाच एक भाग आहे. ज्या रुग्णांना विशेष वैद्यकीय गरजेनुसार 'असिस्टेड न्यूट्रिशन' म्हणजेच सहाय्यक पोषणाची गरज असते, अशा रुग्णांसाठी हाय प्रोटिन असलेला विशेष पोषण आहार उपलब्ध करून दिला जात आहे. यामुळे रुग्णांची प्रतिकारशक्ती वाढून त्यांच्या प्रकृतीत जलद गतीने सुधारणा होण्यास मदत होईल.
रुग्णांचे कल्याण आणि आरोग्य हीच राज्य सरकारच्या आरोग्य धोरणाची मुख्य प्राथमिकता असल्याचे नमूद करत आरोग्यमंत्र्यांनी 'गोवा मॉडेल ऑफ हेल्थकेअर' अधिक मजबूत करण्याचा पुनरुच्चार केला. गोमेकॉमध्ये राबवले जाणारे हे लहान परंतु विचारपूर्वक केलेले बदल रुग्णांच्या दैनंदिन सेवेत मोठा सकारात्मक फरक घडवून आणत आहेत. रुग्णांच्या गरजा लक्षात घेऊन आरोग्य सेवांमध्ये सातत्याने सुधारणा करण्याचे प्रयत्न प्रशासनाकडून सुरू असल्याचेही यावेळी स्पष्ट करण्यात आले.