तीन वर्षांत ३.७४ लाख टन भाताचे उत्पादन

पणजी :राज्यात गेल्या तीन वर्षांत सरासरी ३२ हजार हेक्टर शेतजमिनीत भाताची लागवड करण्यात आली असून, या कालावधीत एकूण ३ लाख ७४ हजार ४३९ टन भाताचे उत्पादन झाले आहे. २०२४-२५ मध्ये अवकाळी पावसामुळे भातशेतीचे मोठे नुकसान होऊन उत्पादनात घट झाली होती. मात्र, २०२५-२६ मध्ये उत्पादनात पुन्हा वाढ झाली, अशी माहिती कृषी संचालनालयाच्या वरिष्ठ अधिकाऱ्यांनी दिली.

२०२३-२४ ते २०२५-२६ या तीन वर्षांच्या कालावधीत गोव्यात एकूण ९७ हजार ५६८ हेक्टर जमिनीत भाताची लागवड झाली. या कालावधीत ३ लाख ७४ हजार ४३९ टन भाताचे उत्पादन झाले. पावसाळी हंगामात २३ हजार ८७९ हेक्टर जमिनीतून २ लाख ६० हजार टन, तर रब्बी हंगामात ८ हजार ५९९ हेक्टर जमिनीतून १ लाख १४ हजार टन भाताचे उत्पादन झाले.

अवकाळी पावसाचा २०२४-२५ मध्ये मोठा फटका

२०२३-२४ मध्ये ३२ हजार ४७७ हेक्टर जमिनीत भाताची लागवड झाली आणि १ लाख ४२ हजार टन उत्पादन झाले. मात्र, २०२४-२५ मध्ये अवकाळी पावसामुळे भातशेतीचे मोठे नुकसान झाले. या वर्षी लागवडीखालील क्षेत्रात १३६ हेक्टरने वाढ झाली असतानाही भात उत्पादनात तब्बल २७ हजार १७८ टनांची घट झाली.

२०२५-२६ मध्ये भात लागवडीचे क्षेत्र १३५ हेक्टरने कमी झाले. मात्र, हवामानातील तुलनेने अनुकूल परिस्थिती आणि उत्पादनक्षमतेत सुधारणा झाल्याने भात उत्पादनात पुन्हा वाढ झाली. या वर्षी उत्पादनात २ हजार ६२७ टनांची वाढ नोंदवण्यात आली.