मडगाव: राज्यातील आगामी राजकीय घडामोडी आणि समीकरणांच्या पार्श्वभूमीवर भाजपचा पराभव करण्यासाठी सर्व विरोधी पक्षांनी एकत्र येणे अत्यंत आवश्यक आहे, असे प्रतिपादन आपचे वेळ्ळी मतदारसंघाचे आमदार क्रूझ सिल्वा यांनी केले आहे. विरोधकांची मते विभागली जाऊ नयेत यासाठी विरोधी पक्षांमधील युतीबाबतची चर्चा विलंब न करता लवकरात लवकर सुरू झाली पाहिजे, अशी मागणीही त्यांनी या वेळी केली.
आमदार क्रूझ सिल्वा म्हणाले की, आम आदमी पक्षाच्या प्रदेशाध्यक्षांनी युतीबाबत पक्षाची अधिकृत भूमिका यापूर्वीच स्पष्ट केलेली आहे. काँग्रेस पक्षाकडून युतीबाबत चर्चेची सुरुवात करण्याचे संकेत मिळताच पक्षातील वरिष्ठ नेतृत्वाने यावर अत्यंत सकारात्मक भूमिका मांडली आहे. काँग्रेससह भाजपविरोधात असलेल्या कोणत्याही पक्षाशी युती करण्यासाठी आम आदमी पक्ष पूर्णपणे तयार आहे. भाजपला रोखण्यासाठी समान विचारसरणीच्या सर्व पक्षांनी एका व्यासपीठावर येणे गरजेचे आहे.
यापूर्वी पार पडलेल्या दक्षिण गोवा लोकसभा निवडणुकीचे उदाहरण देत आमदार सिल्वा यांनी सांगितले की, विरोधी पक्षांनी एकत्र येऊन लढा दिल्यास कसा यश मिळवता येते, हे त्या निकालाने दाखवून दिले आहे. त्याच धर्तीवर आगामी काळातही विरोधकांची भक्कम युती होणे आवश्यक आहे. भाजपच्या वाढत्या प्रभावाला रोखण्यासाठी आणि विरोधी मतांचे विभाजन टाळण्यासाठी सर्व नेत्यांनी एकत्र येऊन रणनीती आखावी, असे आवाहनही त्यांनी केले.