पणजी : एसटी समाजाच्या राजकीय आरक्षणासाठी गेली अनेक वर्षे लढा देणाऱ्या उटा संघटनेच्या नियोजित महामेळाव्याला प्रशासकीय स्तरावर अडथळा निर्माण झाला आहे. पणजीतील ऐतिहासिक आझाद मैदानावर १३ ऑगस्ट रोजी आयोजित करण्यात आलेल्या महामेळाव्यास प्रशासनाकडून परवानगी नाकारण्यात आल्यामुळे उटाने आंदोलनाचे ठिकाण बदलण्याचा महत्त्वपूर्ण निर्णय घेतला आहे. आता हा महामेळावा फोंडा तालुक्यातील म्हार्दोळ येथील ऐतिहासिक क्रांती मैदानावर निर्धारित दिवशी दुपारी तीन वाजता होणार आहे.
उटाच्या प्रतिनिधींनी नुकतीच राज्याचे मुख्यमंत्री डॉ. प्रमोद सावंत यांची भेट घेऊन १३ ऑगस्टच्या महामेळाव्याच्या पूर्वतयारीची सविस्तर माहिती दिली होती. मात्र, या भेटीनंतर अवघ्या काही तासांतच प्रशासनाकडून आझाद मैदानावर मेळावा घेण्यास अचानक असमर्थता दर्शवणारे पत्र उटाच्या नेतृत्वाला प्राप्त झाले. या अनपेक्षित घडामोडीमुळे उटाच्या प्रमुख पदाधिकाऱ्यांची तात्काळ बैठक पार पडली. गेल्या दोन-तीन महिन्यांपासून गोवाभरातील १० तालुक्यांमधील गावातील वाड्यावाड्यांवर बैठका घेऊन या मेळाव्याची जोरदार तयारी करण्यात आली होती. त्यामुळे तारीख न बदलता केवळ ठिकाण बदलून आंदोलन अधिक प्रभावीपणे करण्याचा निर्णय उटाच्या नेतृत्वाने घेतला.
गोव्यातील एसटी समाजाला २०२७ च्या विधानसभा निवडणुकीत राजकीय आरक्षण लागू व्हावे, ही उटाची मुख्य मागणी आहे. यापूर्वी २००६, २०१२, २०१७ आणि २०२२ अशा सलग चार विधानसभा निवडणुकांमध्ये एसटी समाज या राजकीय हक्कापासून वंचित राहिला आहे. सरकारने नुकतीच यासंदर्भात प्राथमिक अधिसूचना जारी केली असली, तरी प्रत्यक्ष अंमलबजावणीची प्रक्रिया निवडणूक आयोगाच्या अंतिम टप्प्यात वेळेत पूर्ण होणे अत्यंत गरजेचे आहे. आगामी निवडणुकीला अवघे काही महिने शिल्लक असल्याने, सरकारने दोन ते अडीच महिन्यांच्या मर्यादित कालावधीत ही संपूर्ण प्रक्रिया पूर्ण करावी, असा उटाचा आग्रह आहे.
म्हार्दोळ येथील क्रांती मैदानावर होणारा हा महामेळावा पूर्णपणे शांततामय आणि सनदशीर मार्गाने पार पडेल, असे आयोजकांनी स्पष्ट केले आहे. डॉ. बाबासाहेब आंबेडकर यांनी दिलेल्या घटनात्मक हक्कांच्या चौकटीत राहून एसटी बांधव, महिला आणि तरुण मोठ्या संख्येने एकत्र येत आपली वज्रमूठ दाखवणार असल्याची माहिती नेत्यांनी दिली. प्रशासकीय अडथळ्यांनंतरही हा मेळावा यशस्वी करण्यासाठी सर्व तालुक्यांतील कार्यकर्ते जोमाने कामाला लागले असल्याचे त्यांनी स्पष्ट केले.