'मुलींचा पाठलाग केला नाही, रस्ता विचारत होतो' असा दावा
पणजी : सोशल मीडियावर व्हायरल झालेल्या एका व्हिडिओमध्ये (Social media viral video) मुलींचा पाठलाग केल्याचा आरोप झालेल्या २५ वर्षीय तरुणाला कळंगुट पोलिसांनी तातडीने शोधून ताब्यात घेतले आहे. चौकशीदरम्यान संबंधित तरुणाने आपण मद्यधुंद अवस्थेत होतो आणि मुलींना केवळ रस्ता विचारण्यासाठी थांबवले होते, असा दावा करत पाठलाग किंवा छळ केल्याचे आरोप फेटाळून लावले.
१८ जुलै २०२६ रोजी सोशल मीडियावर तसेच विविध वृत्तवाहिन्यांवर एका स्कूटरस्वाराचा व्हिडिओ मोठ्या प्रमाणावर प्रसारित झाला होता. या व्हिडिओमध्ये संबंधित व्यक्ती मुलींचा पाठलाग करत असल्याचा आरोप करण्यात आला होता. या प्रकरणाची गंभीर दखल घेत कळंगुट पोलिसांनी तातडीने कारवाई करत व्हिडिओतील व्यक्तीचा शोध घेत त्याला ताब्यात घेतले.
चौकशीदरम्यान त्याने आपली ओळख रतन प्रेमसिंग गोरखा (वय २५), मूळ रहिवासी पश्चिम बंगाल व सध्या बार्देश-गोवा येथे वास्तव्यास असल्याचे सांगितले.
पोलिसांच्या चौकशीत रतनने घटनेच्या वेळी आपण मद्याच्या नशेत होतो आणि मुलींना केवळ रस्ता विचारण्यासाठी थांबवले होते, असे सांगितले. मुलींचा पाठलाग, छळ किंवा कोणतेही गैरवर्तन केल्याचा आरोप त्याने नाकारला.
मात्र, सार्वजनिक ठिकाणी मद्यधुंद अवस्थेत वावरणे आणि त्याच्या वर्तनामुळे नागरिकांमध्ये भीती व अस्वस्थता निर्माण होण्याची शक्यता लक्षात घेऊन पोलिसांनी प्रतिबंधात्मक कारवाई केली. त्यानुसार भारतीय नागरिक सुरक्षा संहिता (BNSS), २०२३ मधील कलम ३५ अंतर्गत त्याला ताब्यात घेऊन अटक करण्यात आली.
या प्रकरणाचा अधिक तपास कळंगुट पोलीस स्थानकाकडून (Calangute Police Station) सुरू असून, व्हायरल व्हिडिओतील आरोपांचीही सखोल चौकशी करण्यात येत आहे.
