डिजिटल विश्वात मनोरंजनप्रेमींसाठी हा आठवडा अत्यंत खास ठरणार आहे. नेटफ्लिक्स, जिओहॉटस्टार आणि सोनीलिव्ह यांसारख्या आघाडीच्या ओटीटी प्लॅटफॉर्मवर सस्पेन्स, थ्रिलर, स्पोर्ट्स ड्रामा आणि कौटुंबिक कथांचा मनोरंजक नजराणा भेटीस येत आहे. दाक्षिणात्य सुपरस्टार राम चरणच्या बहुप्रतीक्षित ‘पेड्डी’ चित्रपटापासून ते सनी देओल, अक्षय खन्ना यांच्या ‘इक्का’ या कोर्टरूम थ्रिलरपर्यंत ओटीटीवर धमाका पहायला मिळणार आहे.
लिटल हाऊस ऑन द प्रेरी । नेटफ्लिक्स
एका प्रसिद्ध पुस्तक मालिकेवर आधारित ही सीरिज प्रेक्षकांना अमेरिकेच्या दुर्गम आणि खडतर सीमाभागातील प्रवासावर घेऊन जाते. इंगल्स कुटुंबाचा निसर्गाच्या सानिध्यातील संघर्ष, कौटुंबिक नातेसंबंध आणि जगण्याची धडपड यात अतिशय भावनिक आणि प्रभावीपणे मांडण्यात आली आहे.
पेद्दी । नेटफ्लिक्स
ही कथा आहे एका अत्यंत प्रतिभावान पण पैशाच्या मागे धावणाऱ्या क्रिकेटपटूची. एका गावातील नेत्याच्या मुलीच्या प्रेमात पडल्यानंतर त्याचे आयुष्य पूर्णपणे बदलते. तो क्रिकेट सोडून कुस्तीकडे वळतो आणि आपल्या गावाचा कायापालट करू शकणाऱ्या रेल्वे स्टेशनसाठी संपूर्ण गावाला संघटित करून एका बलाढ्य शत्रूविरुद्ध लढा देतो.
इक्का । नेटफ्लिक्स
सनी देओल, अक्षय खन्ना, तिलोत्तमा शोम यांच्या भूमिका असलेला हा एक कोर्टरुम ड्रामा आहे. प्रसिद्ध वकील अर्जुन मेहरा (सनी देओल) हा शौर्यमान गौर (अक्षय खन्ना) या अशा व्यक्तीची केस लढतो, ज्याच्यावर खुनाच्या प्रयत्नाचा आरोप आहे. आपल्या एका जवळच्या व्यक्तीचा जीव धोक्यात असल्याने, अर्जुन सरकारी वकील (तिलोत्तमा शोम) यांच्याविरुद्ध कोर्टात कायदेशीर आणि बेकायदेशीर डावपेच खेळून खटला जिंकण्याचा प्रयत्न करतो.
मिगुएल एंजेल ब्लँको: द ४८ आवर्स दॅट चेंज्ड स्पेन । नेटफ्लिक्स
ही डॉक्युमेंट्री १९९७ मधील मिगुएल एंजेल ब्लँको यांच्या अपहरणाच्या त्या थरारक घटनेवर प्रकाश टाकते, ज्या घटनेने संपूर्ण स्पेनला ‘ईटीए’ दहशतवादाविरुद्ध एकत्र आणले होते. यात कधीही न पाहिलेले आर्काइव्ह फुटेज आणि प्रत्यक्ष साक्षीदारांच्या मुलाखती पाहायला मिळतील.
लँड ऑफ फुटबॉल । जिओहॉटस्टार
केरळमधील फुटबॉलची क्रेझ आणि तिथल्या लोकांचे या खेळाप्रती असलेले वेड या सीरिजमध्ये दाखवण्यात आले आहे. स्थानिक स्पर्धांपासून ते कट्टर चाहत्यांच्या गराड्यापर्यंत, फुटबॉल हा खेळ केरळच्या सांस्कृतिक ओळखीचा कसा एक अविभाज्य भाग बनला आहे, याचे सुंदर चित्रण यात केले आहे.
बाल्टी । सोनीलिव्ह
नवोदित दिग्दर्शक उन्नी सिवलिंगम यांनी दिग्दर्शित केलेला हा चित्रपट चार चॅम्पियन कबड्डी पटूंच्या आयुष्यावर आधारित आहे. केरळ-तामिळनाडू सीमेवरील गुन्हेगारी आणि टोळीयुद्धाच्या विळख्यात अडकल्यानंतर त्यांच्यातील जीवाभावाची मैत्री कशी पणाला लागते, याचे थरारक चित्रण यात आहे.
द अपार्टमेंट जॉब । नेटफ्लिक्स
एक माजी गँग लीडर आणि एक महत्त्वाकांक्षी तरुण वकील एका लक्झरी अपार्टमेंट कॉम्प्लेक्सच्या रहिवासी संघटनेची निवडणूक जिंकून तिथला राखीव निधी चोरण्याचा कट रचतात. मात्र, हा सोपा वाटणारा प्लॅन एका वेगळ्याच वळणावर जातो जेव्हा त्यांना तिथे पसरलेल्या मोठ्या भ्रष्टाचाराचा सुगावा लागतो. यानंतर हे चोर चक्क तिथले स्थानिक हिरो बनतात.
