ऑक्टोबरचा शेवटचा आठवडा डिजिटल विश्वात अत्यंत रोमांचक ठरणार आहे. येत्या शुक्रवारी, म्हणजेच ३० ऑक्टोबर रोजी, नेटफ्लिक्स, ॲपल टीव्ही आणि जिओ-हॉटस्टारसारख्या प्रमुख ओटीटी प्लॅटफॉर्मवर नवीन चित्रपट आणि सीरिज प्रदर्शित होत आहेत. क्राईम ड्रामा, हॉरर, सायकॉलॉजिकल थ्रिलर ते कौटुंबिक कथांपर्यंत विविध विषयांचा भरणा असलेली ही यादी वीकेंडच्या मनोरंजनासाठी सज्ज झाली आहे.
अक्का । नेटफ्लिक्स
१९८० च्या दशकातील पार्श्वभूमीवर आधारित ‘अक्का’ ही एक थरारक क्राईम ड्रामा सीरिज आहे. ‘पेर्नुरु’ या काल्पनिक शहरावर कब्जा मिळवून असलेल्या दोन गुंड महिलांची ही कथा आहे. भवानी (कीर्ती सुरेश) आणि रुद्र (राधिका आपटे) यांच्यातील तीव्र वैर आणि वर्चस्वाची लढाई त्यांच्या संपूर्ण साम्राज्याला धोक्यात आणते. या दोघांच्या संघर्षात एका गूढ अनोळखी व्यक्तीचे आगमन शहराचे संपूर्ण सत्तासमीकरण बदलून टाकते.
नॉकटर्न । ॲपल टीव्ही
माजी सैनिक आणि सध्याचा होमिसाईड डिटेक्टिव्ह जोनाह लिन (लीव्ह श श्रायबर) फिलाडेल्फियाची गुन्हेगारी सोडून पेनसिल्व्हेनियातील एका शांत शहरात आपल्या कुटुंबासह स्थायिक होतो. परंतु, जुरेक वॉल्टर (स्टीफन ग्रॅहॅम) या धोकादायक सिरियल किलरचे आगमन त्याच्या या शांत आयुष्यात वादळ आणते. आपल्या कुटुंबाचे आणि शहराचे रक्षण करण्यासाठी जोनाहला एका भयानक धोक्याचा सामना करावा लागतो.
ऑब्सेशन । जिओ-हॉटस्टार
‘ऑब्सेशन’ ही एका गूढ आणि भयानक शापाची कथा आहे. बेअर (माईकल जॉन्स्टन) नावाचा एक तरुण आपल्या बालपणीची मैत्रीण निक्कीयचे (इंडे नवारेटे) प्रेम मिळवण्यासाठी एका अलौकिक वस्तूचा आधार घेतो. मात्र, या इच्छेची त्याला मोठी किंमत मोजावी लागते. निक्कीयवर एका अमानवी शक्ती ताबा मिळवते आणि ती एका हिंसक खुनीत रुपांतरित होते. या शापाच्या जाळ्यातून सुटण्याच्या बेअरच्या प्रयत्नांचा भयानक शेवट होतो.
अ कपल ऑफ लाईज । नेटफ्लिक्स
स्टिफन अहानहेम यांच्या प्रसिद्ध कादंबरीवर आधारित ही चार भागांची स्वीडिश सीरिज आहे. आपले विस्कळीत झालेले वैवाहिक आयुष्य वाचवण्यासाठी स्टॉकहोम आणि सिसिली येथील दोन श्रीमंत जोडपे आपापल्या आलिशान घरांची अदलाबदल करतात. परंतु, या घरात लपवलेले गुप्त कॅमेरे आणि धक्कादायक रहस्ये उघडकीस आल्यानंतर हा प्रवास एका भयानक मानसिक खेळात बदलतो.
मीठे में क्या है । नेटफ्लिक्स
हलक्या-फुलक्या आणि कौटुंबिक नातेसंबंधांवर आधारित असलेल्या या मालिकेत एका बहुपिढी कुटुंबाची कथा दाखवली आहे. सणासुदीच्या वातावरणात संपूर्ण कुटुंब एकत्र आलेले असतानाच, लग्नाच्या एका अचानक आलेल्या बातमीमुळे कुटुंबातील जुनी रहस्ये आणि मतभेद उघडकीस येतात.
कॉलिजन कोर्स । नेटफ्लिक्स
२०१३ च्या स्पेनमधील आर्थिक संकटाच्या पार्श्वभूमीवर आधारित या चित्रपटात मद्रिदमधील एका मोठ्या बँक दरोड्याची कथा मांडण्यात आली आहे. अत्यंत योजनाबद्ध पद्धतीने सुरू झालेला दरोडा अचानक अनियंत्रित होतो आणि दरोडेखोरांमध्येच विश्वासघात, खोटे बोलणे आणि एकमेकांपासून वाचण्याची चढाओढ सुरू होते.