यंदाच्या आठवड्यात डिजिटल प्लॅटफॉर्मवर मनोरंजनाचा मोठा धमाका होणार आहे. शुक्रवारी, ६ नोव्हेंबर रोजी नेटफ्लिक्स, झी५, सोनीलिव्ह आणि ॲमेझॉन प्राइम व्हिडिओ यांसारख्या आघाडीच्या ओटीटी प्लॅटफॉर्मवर विविध भाषांमधील नवीन चित्रपट आणि सीरिज प्रदर्शित होत आहेत. अक्षय कुमार आणि सैफ अली खान यांच्या मुख्य भूमिका असलेला थरारक क्राइम थ्रिलर ‘हैवान’ ते ‘पॉसिबल लव्ह’ या रोमँटिक ड्रामापर्यंत, सर्व प्रेक्षकांसाठी या आठवड्यात मेजवानी असणार आहे.
पॉसिबल लव्ह । नेटफ्लिक्स
दिग्दर्शक ली चांग-डोंग यांचा ‘पॉसिबल लव्ह’ हा कोरियन ड्रामा चित्रपट दोन भिन्न सामाजिक-आर्थिक पार्श्वभूमी असलेल्या विवाहित जोडप्यांची कथा सांगतो. एका डॉक्युमेंट्री प्रोजेक्टदरम्यान एकत्र आल्यावर त्यांच्यातील आकांक्षा, परस्पर दृष्टिकोन आणि लपलेल्या इच्छा समोर येतात, ज्यामुळे त्यांच्या नात्यांवर प्रश्नचिन्ह निर्माण होते.
कॅम्पस ड्रायव्हर्स । ॲमेझॉन प्राइम व्हिडिओ
सी.एस. क्विल यांच्या ‘क्रॅश टेस्ट’ या गाजलेल्या कादंबरीवर आधारित ही सीरिज आहे. लोईस (कार्मेन कॅसोविट्झ) आणि लेन (बैप्टिस्ट मॅसेलिन) यांच्या अनपेक्षित एकत्र राहण्याने सुरू होणाऱ्या प्रेमाची ही एक रंजक कथा आहे.
हैवान । सोनीलिव्ह
२०१६ मधील मल्याळम चित्रपट ‘ओप्पम’चा हा अधिकृत हिंदी रिमेक आहे. सैफ अली खान यात एका अंध मार्शल आर्टिस्ट (श्याम राणे) च्या भूमिकेत आहे, ज्याच्यावर त्याच्या मेंटॉरच्या हत्येचा खोटा आरोप लागतो. अक्षय कुमार यात मुख्य आरोपीच्या (परशुराम गोखले) भूमिकेत दिसणार आहे.
अंडर सीज । नेटफ्लिक्स
कोलंबियामध्ये १९८५ मध्ये घडलेल्या ऐतिहासिक ‘पॅलेस ऑफ जस्टिस’ संघर्षावर ही सीरिज आधारित आहे. देशाचा इतिहास बदलणाऱ्या या २७ तासांच्या भीषण घटनेचे आणि त्याच्याशी जोडलेल्या लोकांच्या आयुष्याचे चित्रण यात करण्यात आले आहे.
ऑक्वाफिना: द अनलाईकली कुक । ॲपल टीव्ही+
प्रसिद्ध अभिनेत्री आणि कॉमेडियन नोरा लम (ऑक्वाफिना) न्यू यॉर्कमधील तिचे कौटुंबिक कॅन्टोनीज रेस्टॉरंट ‘लम’ पूर्ववत सुरू करण्यासाठी एका स्वयंपाकाच्या प्रवासावर निघते. दिग्गज शेफ आणि कुटुंबीयांच्या मदतीने ती हा मार्ग कसा शोधते, हे यात पाहायला मिळेल.
नूरु कोडी वानाविल । झी५
हरिश कल्याण आणि सिद्धी इदनानी यांच्या मुख्य भूमिका असलेला हा तमिळ रोमँटिक ड्रामा आहे. भिन्न विचारसरणी असलेल्या दोन व्यक्तींमधील अचानक झालेली भेट, निर्माण झालेली लव्ह स्टोरी आणि त्यानंतर कौटुंबिक अडचणींवर ते कसा मार्ग काढतात, याची ही कथा आहे.
मीसया मुरुकु २ । सोनीलिव्ह
हिपहॉप तमिझा आधी यांच्या आयुष्यावरून प्रेरित असलेला हा संगीतमय ड्रामा आहे. गझल आणि ‘गाना’ संगीताला जागतिक स्तरावर नेण्याचे स्वप्न पाहणाऱ्या एका तरुण गायकाचा संघर्ष आणि त्याचा संगीत प्रवास यात मांडण्यात आला आहे.