नवे वाडे येथील ५४४ घरे रहिवाशांच्या नावावर होणार

वास्को : वास्को येथील नवे वाडे भागातील गोवा गृहनिर्माण मंडळाच्या जागेवरील ५४४ घरे लवकरच संबंधित रहिवाशांच्या नावावर करण्याचा महत्त्वपूर्ण निर्णय घेण्यात आला आहे. अनेक वर्षांपासून प्रलंबित असलेला हा प्रश्न अंतिम टप्प्यात पोहोचल्याची माहिती वाहतूक मंत्री मॉवीन गुदिन्हो यांनी दिली.

नवे वाडे येथील गृहनिर्माण मंडळाच्या वसाहतीत ५४४ कुटुंबे अनेक वर्षांपासून वास्तव्यास आहेत. ही घरे संबंधितांच्या नावावर करण्यासाठी आवश्यक प्रक्रिया सुरू होती. मुरगाव पालिका आणि गृहनिर्माण मंडळ यांच्यातील व्यवहार पूर्ण झाला असून आता मुरगाव पालिका आणि मुरगाव नियोजन व विकास प्राधिकरण यांच्यातील अंतिम प्रक्रिया पूर्ण झाल्यानंतर मालकी हस्तांतरणाचा मार्ग खुला होणार आहे.

नवे वाडे येथील जुने सार्वजनिक शौचालय पाडून त्याठिकाणी नव्याने उभारण्यात आलेल्या सुविधेचे उद्घाटन मंत्री मॉवीन गुदिन्हो यांच्या हस्ते करण्यात आले. या सुविधेमुळे परिसरातील रहिवाशांची गैरसोय कमी होणार असल्याचे सांगण्यात आले.

कार्यक्रमाला स्थानिक लोकप्रतिनिधी, नगरपालिका सदस्य आणि नागरिक मोठ्या संख्येने उपस्थित होते.

राज्यातील अपघातांचे प्रमाण कमी करण्यासाठी अपघातप्रवण आणि संवेदनशील ठिकाणी सुधारणा करण्यात आल्या आहेत. धोकादायक वळणांमध्ये बदल, रस्त्यांचे रुंदीकरण तसेच कॅमेरे आणि दिवाबत्तीची व्यवस्था करण्यात आल्याचे मंत्री गुदिन्हो यांनी सांगितले.

वाहतूक नियमांचे उल्लंघन झाल्यास चलन थेट वाहनमालकांच्या पत्त्यावर पाठवले जाणार असल्याचे सांगण्यात आले आहे. यामुळे दंड प्रक्रियेत पारदर्शकता वाढण्याची अपेक्षा व्यक्त करण्यात येत आहे.