निवडणुकीची अधिकृत घोषणा होण्याआधीच भाजपच्या वतीने विविध मेळावे आणि बैठका आयोजित केल्या जातील.
पणजी: राज्यात आगामी विधानसभा निवडणुकीच्या पार्श्वभूमीवर राजकीय घडामोडींना वेग आला असून, त्यावरून राजकीय वातावरण तापू लागले आहे. भाजपच्या संघटनात्मक बांधणीसाठी आणि आगामी निवडणुकीच्या तयारीसाठी भाजपचे राष्ट्रीय नेते लवकरच गोव्याचा दौरा करणार आहेत. याविषयीची माहिती मुख्यमंत्री डॉ. प्रमोद सावंत यांनी दिली असून, यामुळे राजकीय वर्तुळात अनेक चर्चांना उधाण आले आहे.
विधानसभा निवडणुकीच्या पूर्वतयारीच्या अनुषंगाने नुकतीच दिल्लीमध्ये एक महत्त्वपूर्ण बैठक पार पडली. या बैठकीत मुख्यमंत्र्यांनी प्रदेश भाजप अध्यक्ष दामू नाईक यांच्यासोबत भाजपचे राष्ट्रीय अध्यक्ष नितीन नबीन यांची भेट घेतली. या भेटीदरम्यान संघटना अधिक मजबूत करण्यावर आणि आगामी विधानसभा निवडणुकीच्या रणनीतीवर सविस्तर चर्चा झाली.
सध्याच्या गोवा विधानसभेचा कार्यकाळ आगामी मार्च महिन्यात संपत आहे. मात्र, त्याआधीच म्हणजेच या वर्षीच्या अखेरीस निवडणुका होण्याची दाट शक्यता वर्तवली जात आहे. पावसाळ्यानंतर कधीही निवडणुकीची घोषणा होण्याची चिन्हे असून, सर्वच राजकीय पक्षांनी आतापासूनच तयारी सुरू केली आहे. त्यानुसार, निवडणुकीची अधिकृत घोषणा होण्याआधीच भाजपच्या वतीने विविध मेळावे आणि बैठका आयोजित केल्या जाणार आहेत. या माध्यमातून केंद्रीय तसेच स्थानिक नेते मतदारांपर्यंत पोहोचून प्रचाराचा धडाका सुरू करतील.
दुसरीकडे, कामगार दिनानिमित्त आयोजित करण्यात आलेल्या एका सरकारी कार्यक्रमात मुख्यमंत्र्यांनी कामगारांसाठी पाच महत्त्वाच्या योजनांची घोषणा केली. या योजनांच्या माध्यमातून राज्यातील कामगारांना आर्थिक आणि सामाजिक सुरक्षा देण्याचा प्रयत्न केला जात आहे. राजकीय आणि प्रशासकीय पातळीवर होत असलेल्या या घडामोडींमुळे राज्यातील राजकीय वातावरण चांगलेच तापले असून, आगामी काळात निवडणुकीचे चित्र कसे असेल, याकडे सर्वांचे लक्ष लागून आहे.
