इस्लामाबाद : मध्यपूर्वेतील तणावाच्या पार्श्वभूमीवर इराणने अमेरिकेसोबत थेट चर्चेची शक्यता फेटाळून लावत, पाकिस्तानमार्गेच संवाद साधण्याची भूमिका स्पष्ट केली आहे. इराणचे परराष्ट्र मंत्री अब्बास अराघची (Abbas Araghchi) पाकिस्तान दौऱ्यावर पोहोचताच, त्यांच्या सरकारने “या भेटीदरम्यान अमेरिकेसोबत कोणतीही थेट बैठक नियोजित नाही” असे ठामपणे सांगितले.
दरम्यान, व्हाईट हाऊसकडून (White House) संकेत देण्यात आले की, अमेरिकेचे दूत स्टीव विटकॉफ आणि जॅरड कुशनर इस्लामाबादमध्ये येऊन इराणविषयक चर्चेसाठी प्रयत्न करणार आहेत. त्यामुळे पाकिस्तान मध्यस्थीची भूमिका निभावत असल्याचे स्पष्ट झाले आहे. इराणने मात्र आपली भूमिका अप्रत्यक्ष माध्यमातूनच मांडली जाईल, असे सांगत थेट संवाद टाळण्याची भूमीका कायम ठेवली आहे. यामुळे शांतता चर्चेचा मार्ग अजूनही अनिश्चित आणि नाजूक असल्याचे दिसून येत आहे.
इस्रायलचे पंतप्रधान बेंजामीन नेतान्याहू (Benjamin Netanyahu) यांनी लेबनॉनमध्ये इस्रायली लष्कराला “पूर्ण स्वातंत्र्याने कारवाई” करण्याची मुभा असल्याचे सांगितले. सीजफायर वाढवण्यास हिझबुल्लाहने विरोध केल्याने या भागात हल्ले सुरूच असल्याची माहिती आहे. याच वेळी अमेरिकेचे संरक्षणमंत्री पेटे हेगसेठ यांनी इराणला इशारा देत, दीर्घकालीन नौदल नाकेबंदीमुळे देशाची अर्थव्यवस्था कोलमडू शकते, असे म्हटले आहे.
परिस्थिती तणावपूर्ण
एकूणच, पाकिस्तानच्या मध्यस्थीने शांततेचे प्रयत्न सुरू असले तरी, इराण-अमेरिका (Iran-USA) थेट चर्चेवर ठाम नकार आणि इस्रायल-लेबनॉन (Israel-Lebanon) तणावामुळे परिस्थिती अजूनही तणावपूर्णच असल्याचे चित्र आहे.
