तणाव दूर करण्यासाठी प्रयत्न
वॉशिंग्टन : सध्या सुरू असलेल्या तणावावर तोडगा काढण्यासाठी इस्रायल-लेबनॉन (Israel-Lebanon) यांच्यामध्ये उद्या चर्चा होणार असल्याची माहिती अमेरिकेचे राष्ट्राध्यक्ष डोनाल्ड ट्रम्प यांनी दिली. परिस्थिती नियंत्रणात आणण्यासाठी सर्व स्तरावर प्रयत्न सुरू असल्याचे त्यांनी स्पष्ट केले.
अमेरिका आणि इराण यांच्यातील तणावपूर्ण संबंधांमध्ये तोडगा काढण्यासाठी शांतता चर्चेची दुसरी फेरी लवकरच पाकिस्तानात होण्याची शक्यता आहे. या पार्श्वभूमीवर डोनाल्ड ट्रम्प यांनी वरील माहिती दिली.
व्हाइट हाऊसच्या प्रवक्त्या कॅरोलीन लेवीट यांनी दिलेल्या माहितीनुसार, अमेरिका-इराण (US-Iran) चर्चेची पुढील फेरी यापूर्वी ज्या ठिकाणी झाली, त्याच ठिकाणी म्हणजेच पाकिस्तानमध्ये होण्याची दाट शक्यता आहे.
गेल्या सात आठवड्यांपासून सुरू असलेल्या तणावाच्या पार्श्वभूमीवर पाकिस्तानने मध्यस्थीची भूमिका अधिक सक्रिय केली असून, त्यांच्या लष्करप्रमुखांनी तेहरानला भेट देत उच्चस्तरीय चर्चा सुरू केल्या आहेत. त्यामुळे इस्लामाबाद हे या चर्चेचे केंद्र बनत आहे.
अमेरिकेचा इराणवर दबाव कायम
दरम्यान, अमेरिकेने इराणवर दबाव वाढवण्यासाठी सलग तिसऱ्या दिवशी त्यांच्या बंदरांवर नौदल नाकेबंदी कायम ठेवली आहे. होर्मुझ (Strait of Hormuz ) या महत्त्वाच्या सामुद्रधुनीत अमेरिकेची लष्करी हालचाल वाढली असून, इराणच्या तेल निर्यातीवर मर्यादा आणण्याचा प्रयत्न सुरू आहे. डोनाल्ड ट्रम्प (Donald Trump) यांनी कडक इशारा देत सांगितले की, “इराणकडून कोणतीही आक्रमक कारवाई झाल्यास कठोर प्रत्युत्तर दिले जाईल.”
इराणचा इशारा
यावर प्रत्युत्तर म्हणून इराणच्या रिव्होल्युशनरी गार्ड्सनेही इशारा देत, कोणतीही चूक शत्रूंना गंभीर परिस्थितीत अडकवेल, असे म्हटले आहे.
कच्च्या तेलाच्या किमती १०० डॉलर्स प्रति बॅरलच्या वर
या घडामोडींमुळे जागतिक बाजारपेठांमध्ये अस्थिरता निर्माण झाली आहे. कच्च्या तेलाच्या किमती पुन्हा १०० डॉलर्स प्रति बॅरलच्या वर गेल्या असून, शेअर बाजारात घसरण दिसून येत आहे. ऊर्जा पुरवठ्यावर परिणाम होण्याची भीती व्यक्त केली जात आहे.
एकूणच, शांतता चर्चेचे प्रयत्न सुरू असले तरी, लष्करी हालचाली आणि कडक भूमिका यामुळे मध्यपूर्वेतील तणाव अजूनही कायम असल्याचे चित्र दिसत आहे.
