इस्लामाबादमधील शांतता चर्चा निष्फळ!
इराण, अमेरिका आणि इस्रायल यांच्यातील वाढता तणाव निवळण्यासाठी पाकिस्तानच्या मध्यस्थीने आयोजित केलेली शांतता चर्चा कोणत्याही ठोस कराराशिवाय संपुष्टात आली आहे. तब्बल २१ तास चाललेल्या प्रदीर्घ वाटाघाटींनंतरही दोन्ही देशांमधील मतभेद कायम असल्याने ही बोलणी निष्फळ ठरली. या अपयशानंतर आता वॉशिंग्टन आणि तेहरान एकमेकांवर आरोप-प्रत्यारोप करत असून, पश्चिम आशियातील अनिश्चितता अधिकच वाढली आहे.
घानामधील इराणच्या दूतावासाने सोशल मीडियाद्वारे या चर्चेची माहिती दिली. तेहरानने अमेरिकेच्या 'अवास्तव' मागण्या स्पष्टपणे फेटाळून लावल्या आहेत. इराणच्या मते, ज्या सवलती अमेरिकेला लष्करी बळाचा वापर करून मिळवता आल्या नाहीत, त्या आता वाटाघाटींच्या माध्यमातून पदरात पाडून घेण्याचा प्रयत्न वॉशिंग्टनकडून केला जात होता. आम्ही आमच्या राष्ट्रीय हितसंबंधांशी कोणतीही तडजोड करणार नाही, असे स्पष्ट करत इराणने होर्मुझची सामुद्रधुनी अद्याप बंदच राहणार असल्याचे संकेत दिले आहेत.
दुसरीकडे, अमेरिकेचे उपराष्ट्राध्यक्ष जे.डी. व्हान्स यांनी या अपयशाचे खापर इराणवर फोडले आहे. व्हान्स म्हणाले की, अमेरिकेने चर्चेदरम्यान अत्यंत लवचिकता दाखवत आपली 'सर्वोत्तम ऑफर' दिली होती. मात्र, इराणने त्या अटी मान्य करण्यास नकार दिला. अमेरिकेची प्रमुख मागणी इराणच्या अणु कार्यक्रमाबाबत होती. इराणने भविष्यात कधीही अण्वस्त्रे बनवणार नाही, अशी दीर्घकालीन आणि लेखी वचनबद्धता द्यावी, असा अमेरिकेचा आग्रह होता, जो इराणने फेटाळून लावला.
पाकिस्तानने या त्रिपक्षीय चर्चेसाठी पुढाकार घेतला होता, जेणेकरून या प्रदेशात कायमस्वरूपी युद्धविराम लागू करता येईल. मात्र, २१ तासांच्या चर्चेनंतरही अण्वस्त्र कार्यक्रम आणि सागरी निर्बंधांसारख्या कळीच्या मुद्द्यांवर दोन्ही देशांतील दरी कायम असल्याचे स्पष्ट झाले आहे. जे.डी. व्हान्स मायदेशी रवाना झाले असून, आता या भागातील पुढील लष्करी हालचालींकडे आणि राजनैतिक घडामोडींकडे जगाचे लक्ष लागले आहे.
