हरयाणात माजी व्यवस्थापकासह चार जणांना अटक
हरयाणा : आयडीएफसी फर्स्ट बॅंकेतील (IDFC First Bank) ५९० कोटी रुपयांच्या घोटाळाप्रकरणात (Fraud) हरयाणातील (Haryana) राज्य दक्षता व भ्रष्टाचार विरोधी पथकाने (एसव्ही अँड एसीबी) (SV And ACB) पहिली मोठी कारवाई करत माजी बॅंक व्यवस्थापकासह चार जणांना अटक केली आहे.
या प्रकरणामुळे शासकीय निधीच्या सुरक्षेबाबात गंभीर प्रश्न निर्माण झाले आहेत. एसव्ही व एसीबीचे महासंचालक ए. एस. चावला यांनी दिलेल्या माहितीनुसार, माजी बॅंक व्यवस्थापक रिभव रिशी, बॅंकेचा माजी कर्मचारी अभय कुमार तसेच चंदीगडमधील स्वाती सिंगला आणि अभिषेक सिंगला यांना मंगळवारी सायंकाळी ६ वाजण्याच्या सुमारास अटक करण्यात आली.
रिशी हा पंचकुलाचा रहिवासी असून, त्याने सहा महिन्यांपूर्वी बॅंकेतील नोकरीचा राजीनामा दिला होता. देशाबाहेर पलायन टाळण्यासाठी त्याच्याविरुद्ध यापूर्वी ‘लुक आऊट’ नोटीस जारी करण्यात आली होती.
या प्रकरणात ‘एयु लघु फायनान्स बॅंके’मधील कर्मचाऱ्यांसह काही सरकारी कर्मचाऱ्यांविरोधात गुन्हा दाखल करण्यात आला आहे. पंचकुला येथील एसीबी पोलीस ठाण्यात हरयाणाचे मुख्य सचिव अनुराग रस्तोगी यांच्या पत्रानंतर एफआयआर नोंदवण्यात आला.
तपास अधिक तीव्र करण्यासाठी उपअधीक्षक दर्जाच्या अधिकाऱ्याच्या नेतृत्वाखाली आणि पोलीस अधीक्षक (SP) यांच्या देखरेखीखाली विशेष तपास पथक (SIT) स्थापन करण्यात आली आहे. सरकारी कर्मचाऱ्यांच्या भूमिकेची चौकशी करण्यासाठी भ्रष्टाचार प्रतिबंधक कायद्याच्या कलम १३ (२) अंतर्गत गुन्हा नोंदवण्यात आला आहे.
तसेच भारतीय न्याय संहितेतील (BNS) फौजदारी विश्वासघात, कटकारस्थान, फसवणूक आणि बनावट कागदपत्रे तयार करण्याच्या कलमांचाही समावेश करण्यात आला आहे.
सूत्रांच्या माहितीनुसार, हरयाणा सरकारच्या विविध विभागांनी बँकेत जमा केलेल्या ५९० कोटी रुपयांच्या निधीपैकी मोठी रक्कम अन्यत्र वळविण्यात आल्याचे तपासात उघड झाले आहे.
आरोपींनी नेमकी कोणती पद्धत वापरून हा घोटाळा रचला आणि त्यामागील संपूर्ण साखळी काय आहे, याचा सखोल तपास सध्या सुरू आहे. अटकेची कारवाई या बहुस्तरीय आर्थिक गैरव्यवहाराचा उलगडा करण्याच्या दृष्टीने महत्त्वाचा टप्पा मानली जात आहे.
