म्हणाले-कोणत्याही आव्हानाचा सामना करण्यास तयार
पणजी: गोवा राज्य निवडणूक आयोगाने पणजी महानगरपालिकेच्या (सीसीपी) निवडणुकीचे वेळापत्रक जाहीर केल्यानंतर राजकीय घडामोडींना वेग आला आहे. या पार्श्वभूमीवर, पणजीचे महापौर रोहित मोन्सेरात यांनी आपली भूमिका स्पष्ट करताना सांगितले की, निवडणुका कोणत्याही वेळी झाल्या तरी आम्ही त्यासाठी पूर्णपणे सज्ज आहोत. गेल्या पाच वर्षांत आम्ही शहरात अनेक सकारात्मक बदल घडवून आणले असून, कोणत्याही विरोधकाचा किंवा आव्हानाचा सामना करण्यास आमचे पॅनेल तयार आहे, असा विश्वास त्यांनी यावेळी व्यक्त केला.
राज्य निवडणूक आयोगाने जाहीर केल्यानुसार, पणजी महानगरपालिकेसाठी ११ मार्च २०२६ रोजी मतदान होणार असून १३ मार्च रोजी मतमोजणी पार पडणार आहे. यावर भाष्य करताना महापौर म्हणाले की, आमचे कामाचे नियोजन कधीही बदलत नाही. आम्ही लोकांसाठी नेहमीच उपलब्ध असतो आणि लोकांच्या गरजा पूर्ण करणे हीच आमची प्राथमिकता आहे. आगामी निवडणुकीत समोर कोण उमेदवार आहे, यापेक्षा आम्ही केलेल्या विकासकामांच्या जोरावर लोकांसमोर जाणार आहोत. प्रत्येक विरोधकाला आम्ही एक आव्हान म्हणून स्वीकारतो आणि निवडणुकीच्या रिंगणात कोणत्याही परिस्थितीचा सामना करण्याची आमची तयारी आहे.
आपल्या पाच वर्षांच्या कार्यकाळाचा आढावा घेताना रोहित मोन्सेरात यांनी सांगितले की, ही पाच वर्षे अत्यंत आव्हानात्मक होती. कोविड महामारीचे संकट, 'तौक्ते' चक्रीवादळ, स्मार्ट सिटीची कामे आणि पावसाळ्यातील पुराची समस्या अशा अनेक संकटांचा आम्ही यशस्वीपणे सामना केला आहे. यापूर्वी महानगरपालिका नेहमीच कोणत्या ना कोणत्या नकारात्मक कारणांमुळे चर्चेत असायची, परंतु आम्ही सत्तेत आल्यानंतर ही परिस्थिती बदलली. आज पणजी शहर स्वच्छतेच्या बाबतीत राष्ट्रीय स्तरावर इंदूरसारख्या शहरांच्या पंक्तीत जाऊन बसले आहे. पंतप्रधान नरेंद्र मोदी यांनीही शहराच्या या प्रगतीची दखल घेतली आहे, ही आमच्यासाठी अभिमानाची गोष्ट आहे.
शहरातील पुराच्या समस्येवर बोलताना त्यांनी नमूद केले की, पूर्वी अनेकजण म्हणायचे की पणजी पूरमुक्त करणे अशक्य आहे. मात्र, आम्ही दिवसरात्र काम करून, गटारांची स्वच्छता करून आणि योग्य नियोजन करून हे शक्य करून दाखवले आहे. निवडणुकीच्या तोंडावर काही लोक केवळ भावनिक आवाहन करून मते मागण्यासाठी येतील, परंतु सुज्ञ मतदार आम्ही केलेल्या प्रत्यक्ष कामालाच प्राधान्य देतील. आमचे नगरसेवक त्यांच्या प्रभागात सक्रिय आहेत आणि लोकांनी पुन्हा एकदा संधी दिल्यास आम्ही पणजीला जगातील सर्वोत्तम शहरांपैकी एक बनवण्यासाठी प्रयत्नशील राहू, असे आश्वासनही महापौरांनी यावेळी दिले.
