दोन वर्षांत दुसरी दुर्घटना; डीजीसीएच्या नियमांचा उघडपणे भंग
बारामती: उपमुख्यमंत्री अजित पवार यांच्या ज्या विमानाला बारामतीत भीषण अपघात झाला, त्या 'व्हीएसआर व्हेंचर्स' (VSR Ventures) कंपनीच्या विमानाचा हा पहिलाच अपघात नाही. यापूर्वी १४ सप्टेंबर २०२३ रोजी याच कंपनीचे 'लियरजेट ४५' (Learjet 45) हे विमान मुंबई विमानतळावर लँडिंगदरम्यान कोसळले होते. त्या घटनेची पुनरावृत्ती आता बारामतीत झाल्याने या विमान कंपनीच्या तांत्रिक देखभालीवर आणि सुरक्षेवर गंभीर प्रश्नचिन्ह निर्माण झाले आहे.
सप्टेंबर २०२३ मध्ये विशाखापट्टणमहून मुंबईला येत असताना, मुसळधार पाऊस आणि कमी दृश्यमानतेमुळे (Visibility) या कंपनीचे विमान धावपट्टीवरून घसरले होते. त्या अपघातात विमानाचे दोन तुकडे झाले होते आणि सह-वैमानिकासह आठ जण जखमी झाले होते. नशिबाने त्यावेळी कोणाचाही प्राण गेला नव्हता. मात्र, आजच्या बारामतीमधील दुर्घटनेत नियतीने अजिबात साथ दिली नाही. आज अपघातग्रस्त झालेले 'VT-SSK' नोंदणीकृत विमानही लँडिंगच्या वेळीच तांत्रिक अडथळ्याचा बळी ठरले, ज्यामुळे अजित पवारांसह पाच जणांना आपला जीव गमवावा लागला.
एकाच कंपनीची दोन विमाने दोन वर्षांच्या आत अशाच प्रकारे लँडिंगच्या वेळी कोसळल्यामुळे नागरी विमान वाहतूक संचालनालय (DGCA) आता अत्यंत कडक पावले उचलण्याच्या तयारीत आहे. 'व्हीएसआर व्हेंचर्स'ने यापूर्वीच्या अपघातानंतर नेमक्या काय सुधारणा केल्या आणि विमानांच्या सुरक्षेबाबतचे नियम पाळले का, याचा सखोल तपास सुरू करण्यात आला आहे. वारंवार होणाऱ्या या जीवघेण्या अपघातांमुळे खासगी चार्टर्ड विमानांच्या प्रवासातील धोके पुन्हा एकदा चव्हाट्यावर आले आहेत.
