नाशिक पोलिसांच्या पत्रानंतर बेळगांव पोलीस काय म्हणाले ? वाचा
बेळगाव: नाशिकच्या पोलीस अधीक्षकांकडून (एसपी) बेळगाव पोलिसांना ६ जानेवारी रोजी एक अधिकृत पत्र प्राप्त झाले होते. चोर्ला घाटात सुमारे ४०० कोटी रुपयांचा दरोडा किंवा लूट झाल्याचा संशय या पत्रात व्यक्त करण्यात आला आहे, अशी माहिती बेळगावचे पोलीस अधीक्षक के. रामराजन यांनी दिली.
रविवारी बेळगाव येथे आयोजित पत्रकार परिषदेत ते बोलत होते. त्यांनी सांगितले की, गेल्या २२ ऑक्टोबर रोजी संदीप पाटील नावाच्या व्यक्तीचे अपहरण झाले होते. तसेच १६ ऑक्टोबर रोजी सुमारे ४०० कोटी रुपयांची रक्कम लुटण्यात आल्याची प्राथमिक माहिती समोर आली आहे. याव्यतिरिक्त, विशाल नायडू नावाच्या व्यक्तीचे नाशिकमधून अपहरण झाल्याचेही उघड झाले आहे.
बेळगाव पोलिसांनी संदीप पाटील यांची चौकशी केली असता, माझे अपहरण करणाऱ्यांनी आपल्यासमोर पैशांच्या दरोड्याबाबत कबुली दिली होती, असे त्यांनी पोलिसांना सांगितले.
ही कथित घटना चोर्ला घाटात घडल्याने, याप्रकरणी कोणीही तक्रार दिल्यास बेळगाव पोलीस तात्काळ गुन्हा दाखल करतील. या घटनेचे साक्षीदार किंवा पीडित व्यक्तींनी पुढे येऊन तक्रार नोंदवावी, असे आवाहन पोलीस अधीक्षकांनी केले आहे.
या प्रकरणाचा मुख्य तपास महाराष्ट्र पोलीस करत असून कर्नाटक पोलीस त्यांना संपूर्ण सहकार्य करणार आहेत. चोर्ला घाट हा तीन राज्यांच्या सीमेवर असल्याने या प्रकरणाला गांभीर्य प्राप्त झाले आहे. लुटलेली रक्कम नेमकी कोणत्या चलनी नोटांच्या स्वरूपात होती, याची अद्याप अधिकृत पुष्टी झालेली नाही. भविष्यात अशा घटना टाळण्यासाठी चोर्ला घाटात नव्याने सीसीटीव्ही कॅमेरे बसवण्यात येणार असल्याचेही त्यांनी नमूद केले.
दरम्यान, नाशिक पोलिसांचे विशेष तपास पथक (एसआयटी) या प्रकरणाचा छडा लावण्यासाठी बेळगावकडे रवाना झाले आहे. या पथकात नाशिकचे अतिरिक्त पोलीस अधीक्षक आणि वरिष्ठ अधिकारी सहभागी आहेत. हे पथक चोर्ला घाटातील कथित ४०० कोटींच्या लुटीप्रकरणी प्रत्यक्ष घटनास्थळी जाऊन पुरावे, साक्षीदार आणि संबंधित व्यक्तींची चौकशी करणार आहे. बेळगाव पोलिसांशी समन्वय साधून या संयुक्त तपासाला वेग देण्याचे संकेत देण्यात आले आहेत.
