पणजी: गोव्यात गेल्या काही दिवसांपासून तापमानातील वाढीसोबतच कडाक्याच्या थंडीचाही अनुभव येत आहे. शनिवारी पणजीमध्ये १८ अंश सेल्सिअस किमान तापमानाची नोंद झाली. हे २०२५ या वर्षातील पणजीतील दुसरे नीचांकी तापमान ठरले आहे. याआधी १२ डिसेंबर २०२५ रोजी पणजीत किमान १७.५ अंश सेल्सिअस तापमानाची नोंद झाली होती. हवामान खात्याने पुढील सहा दिवस राज्यातील किमान तापमान १८ ते २० अंश सेल्सिअस दरम्यान राहण्याची शक्यता वर्तवली आहे.
शनिवारी मुरगावमध्येही किमान १८ अंश सेल्सिअस तापमानाची नोंद झाली. राज्यात २१ ते २६ डिसेंबर दरम्यान काही ठिकाणी पहाटे मध्यम स्वरूपाचे धुके पडण्याची शक्यता आहे. या कालावधीत राज्यातील कमाल तापमान ३१ ते ३३ अंश सेल्सिअसच्या दरम्यान राहील. शनिवारी पणजीत ३१.५ अंश, तर मुरगावमध्ये ३१.६ अंश सेल्सिअस कमाल तापमानाची नोंद झाली.
सध्या राज्यात रात्री आणि पहाटे तीव्र थंडी जाणवत आहे. पहाटे काही ठिकाणी धुके पडत असून सकाळी गार वाऱ्याची झुळूक अनुभवायला मिळत आहे. मात्र, दुपारनंतर उन्हाची तीव्रता वाढत आहे. राज्यात डिसेंबर महिन्यातील किमान तापमान साधारणपणे २० ते २२ अंशांच्या दरम्यान असते, मात्र गेल्या काही दिवसांत किमान तापमान सरासरीपेक्षा १.५ ते ३.९ अंशांनी कमी नोंदवले गेले आहे. डिसेंबर महिन्यात राज्यातील किमान तापमान सरासरीपेक्षा कमी राहील, अशी शक्यता हवामान खात्याने याआधीच व्यक्त केली होती.
