‘डीआरआय’च्या गोवा विभागाची कारवाई : दोघांनाही तीन दिवसांची कोठडी
संजय सोनी
प्रतिनिधी। गोवन वार्ता
पणजी : दारूगोळा बेकायदेशीरपणे आयात केल्याच्या प्रकरणात केंद्रीय महसूल गुप्तचर संचालनालयाच्या (डीआरआय) गोवा विभागाने वेर्णा येथील ‘ह्युज प्रेसिझन’ या कंपनीचे व्यवस्थापकीय संचालक (एमडी) संजय वेद्राक्ष सोनी आणि लॉजिस्टिक्स मॅनेजर जयेश पांडुरंग शेट्ये यांना बुधवारी दुपारी अटक केली. दोघांना पणजी येथील प्रथमवर्ग न्यायालयाने तीन दिवसांची डीआरआयची कोठडी ठोठावली.
डीआरआयच्या गोवा विभागाने वेर्णा येथील ‘ह्युज प्रेसिझन’ या कंपनीची तसेच विदेशांतून आणलेल्या आणि विमानतळावर उतरवलेल्या मालांची तपासणी केली होती. त्यावेळी डीआरआयने ७ जून २०२५ रोजी ९२ लाख ८३ हजार ४५९ रुपये आणि २ नोव्हेंबर २०२५ रोजी १८ लाख ३२ हजार ५०६ रुपये किमतीचा माल संशयितांच्या कंपनीने आयात केल्याचे समोर आले होते. त्यानुसार डीआरआयने वरील एकूण १ कोटी ११ लाख १५ हजार ९६५ रुपये किमतीचे दोन मोठे कन्साइनमेंट्स जप्त केले होते.
या संदर्भात कंपनीच्या अधिकार्यांची चौकशी केली असता, त्यांनी डीआरआयकडे बनावट कागदपत्रे सादर केली. तसेच बनावट ई मेल्स सादर करून तपास यंत्रणेची दिशाभूल करण्याचा प्रयत्न केला होता. हा प्रकार लक्षात येताच डीआरआयने गुन्हा नोंदवून १९ नोव्हेंबर २०२५ रोजी कंपनीचे व्यवस्थापकीय संचालक संजय वेद्राक्ष सोनी आणि लॉजिस्टिक्स मॅनेजर जयेश पांडुरंग शेट्ये यांना अटक केली. त्यांची पणजी येथील प्रथमवर्ग न्यायालयाने जामिनावर सुटका केली होती. या आदेशाला डीआरआयने गोवास्थित मुंबई उच्च न्यायालयात आव्हान दिले. न्यायालयाने संशयितांचा जामीन रद्द करून त्यांना शरण येण्याचा आदेश दिला होता. शरण न येता त्यांनी सर्वोच्च न्यायालयात आव्हान दिले. याच दरम्यान दोघांनी आव्हान मागे घेतले. सर्वोच्च न्यायालयाने त्यांची याचिका फेटाळून लावली.
सर्वोच्च न्यायालयाने याचिका फेटाळल्यानंतर शरणागती
सर्वोच्च न्यायालयाने याचिका फेटाळल्यानंतर कंपनीचे व्यवस्थापकीय संचालक संजय वेद्राक्ष सोनी आणि लॉजिस्टिक्स मॅनेजर जयेश पांडुरंग शेट्ये यांच्यासमोर काहीच पर्याय राहिला नसल्यामुळे बुधवारी ते डीआरआयला शरण आले. त्यांना अटक करून पणजी येथील प्रथमवर्ग न्यायालयासमोर हजर करण्यात आले. न्यायालयाने त्यांना तीन दिवसांची डीआरआयची कोठडी ठोठावली आहे.
