ते ट्रॉलर माझे नाहीत; माझ्याविरोधात राजकीय षडयंत्र : आमदार केदार नाईक

पणजी: बंदी घालण्यात आलेल्या एलईडी मासेमारी गियरचा वापर करून महाराष्ट्राच्या सागरी हद्दीत बेकायदेशीर मासेमारी केल्याप्रकरणी महाराष्ट्र मच्छिमार खात्याच्या अधिकाऱ्यांनी जप्त केलेले दोन ट्रॉलर्स माझे नाहीत आणि माझ्या नावावर नोंदणीकृत नाहीत, असा खुलासा आमदार केदार नाईक यांनी केला आहे. जप्त करण्यात आलेल्या या ट्रॉलर्सशी विरोधकांकडून आपले नाव जोडले जात असून, हा राजकीय बदनामीचा प्रयत्न असल्याचा आरोपही त्यांनी केला.

नेमके प्रकरण काय?

काही दिवसांपूर्वी महाराष्ट्राच्या सागरी हद्दीचे उल्लंघन करून बेकायदेशीर मासेमारी केल्याप्रकरणी गोवास्थित दोन ट्रॉलर्स महाराष्ट्र मच्छिमार खात्याने जप्त केले होते. सूत्रांनी दिलेल्या माहितीनुसार, जप्त झालेले हे ट्रॉलर्स बार्देशमधील एका आमदाराच्या मालकीचे असल्याचे उघड झाले होते. यामुळे आमदार केदार नाईक यांना याबाबत विचारणा करण्यात आली होती.

यावर माध्यमांशी बोलताना नाईक यांनी स्पष्ट केले की, आपल्या कुटुंबाचा मासेमारी ट्रॉलरचा व्यवसाय पिढ्यानपिढ्या सुरू आहे. सध्या आपण राजकीय जबाबदाऱ्यांमध्ये व्यस्त असल्यामुळे, आपल्या मालकीचे चार ट्रॉलर्स इतरांना चालवण्यासाठी दिले आहेत. मात्र, महाराष्ट्रात जप्त झालेल्या ट्रॉलर्सशी आपला कोणताही संबंध नाही.

गोव्याने महाराष्ट्र आणि कर्नाटकचे एकूण १६ ट्रॉलर्स जप्त केले होते

या घटनेमुळे गोवा आणि महाराष्ट्र यांच्यातील मासेमारीच्या हद्दीवरून सुरू असलेल्या वादाला पुन्हा एकदा धार मिळाली आहे.

यापूर्वी गोवा मत्स्य विभागाने आणि किनारी पोलिसांनी संयुक्त मोहीम राबवत गोव्याच्या हद्दीत बेकायदेशीरपणे मासेमारी करणाऱ्या महाराष्ट्र (रत्नागिरी) आणि कर्नाटक येथील एकूण १६ ट्रॉलर जप्त केले होते. यापैकी रत्नागिरीतील १० ट्रॉलर कळंगूटजवळ पकडले होते. मत्स्य खात्याचे मंत्री हळर्णकर यांनी त्यावेळी कायद्याचे उल्लंघन करणाऱ्यांवर कठोर कारवाई करण्याचा पुनरुच्चार केला होता.

गोव्याने महाराष्ट्राच्या ट्रॉलरवर कारवाई केल्यानंतर, आता महाराष्ट्राने गोव्याच्या ट्रॉलर्सवर कारवाई केल्याने दोन्ही राज्यांतील व्यावसायिकांमध्ये तणाव निर्माण होण्याची शक्यता आहे. एकंदरीत, गोमंतकीय आमदाराशी ट्रॉलर्सचे नाव जोडले गेल्यामुळे या बेकायदेशीर मासेमारी प्रकरणाला आता राजकीय वळण मिळाले आहे.