वार्का येथील घटना; संशयित ज्यो परेराविरोधात खुनाचा प्रयत्न आणि चोरी केल्याप्रकरणी गुन्हा नोंद
मडगाव: वार्का येथे मालमत्तेच्या जुन्या वादातून लासिमा गाल्डिनो नावाच्या महिलेवर लोखंडी रॉडने प्राणघातक हल्ला करून त्यांना गंभीर जखमी करण्यात आले. याप्रकरणी संशयित ज्यो परेरा याच्याविरोधात कोलवा पोलिसांनी खुनाचा प्रयत्न आणि चोरी केल्याप्रकरणी गुन्हा नोंद केला आहे.
मिळालेल्या माहितीनुसार, वार्का येथील फिडमोअर रेस्टॉरंटजवळ शुक्रवारी दुपारी ही मारहाणीची घटना घडली. मालमत्तेच्या वादातून शाब्दिक वादाचे रूपांतर मारहाणीत झाले. संशयित ज्यो परेरा याने लासिमा गाल्डिनो यांच्या डोक्यावर लोखंडी रॉडने हल्ला केला. यात त्या गंभीर जखमी झाल्या असून, त्यांच्यावर बांबोळी येथील गोवा वैद्यकीय महाविद्यालय (GMC) रुग्णालयात उपचार सुरू आहेत.
हल्ला केल्यानंतर संशयित ज्यो परेरा याने लासिमा यांचा मोबाइलही घेऊन पळ काढला. पोलिसांनी संशयित ज्यो परेरा याच्याविरोधात कलम ३०७ (खुनाचा प्रयत्न) आणि चोरी केल्याप्रकरणी गुन्हा नोंदवला आहे. संशयिताने मोबाइल बंद करून ठेवला असून, कोलवा पोलीस त्याचा शोध घेत आहेत. पोलीस निरीक्षक विक्रम नाईक यांच्या मार्गदर्शनाखाली पोलीस उपनिरीक्षक रक्षा नाईक पुढील तपास करत आहेत.
दरम्यान, या घटनेनंतर माजी मंत्री चर्चिल आलेमाव यांनी पत्रकार परिषद घेऊन पोलिसांनी आणि गृहमंत्र्यांनी या प्रकाराची दखल घेऊन गुंडागिरी करणाऱ्यांवर कठोर कारवाई करावी, अशी मागणी केली आहे.
