नदी परिवहनकडून ‘बांधा आणि चालवा’ तत्त्वावर निविदा जारी
पणजी : सा-पेंद्र ते दिवाडी या मांडवी नदीतील जलमार्गावर लवकरच रो-रो फेरीबोट सेवा सुरू होईल. सुमारे ५० प्रवासी आणि १९ वाहनांची क्षमता असलेली नवीन रो-रो फेरीबोट बांधण्यासाठी नदी परिवहन खात्याने निविदा जारी केली आहे. ६ महिन्यांत रो-रो फेरीबोट या मार्गावर प्रवाशांच्या सेवेसाठी दाखल होईल.
ही रो-रो फेरीबोट 'बांधा आणि चालवा' या तत्त्वावर बांधण्यासाठी नदी परिवहन खात्याने निविदा जारी करून इच्छुक जहाज बांधणी कंपनीकडून अर्ज मागवले आहेत. सा-पेंद्र ते दिवाडी जलमार्गावर दोन रो-रो फेरीबोटी फेऱ्या मारतील. प्रत्येक फेरीबोटीची क्षमता ८ ते ९ दुचाकी, २० मोटारी आणि ५० प्रवाशांना घेऊन जाण्याची असेल. ही फेरीबोट दिवसाचे २४ तास प्रवाशांच्या सेवेत असेल. जे सध्या अस्तित्वात असलेले फेरीचे धक्के आहेत, त्यांना जुळणारे या रो-रो फेरीबोटींचे दोन्ही रॅम्प असतील. सा-पेंद्र आणि दिवाडी येथील सध्याचे फेरीधक्के, फेरीबोटी तसेच पाण्याची खोली आणि ओहोटीचा अभ्यास करून रो-रो फेरीबोटींचे डिझाईन तयार करण्यास सांगितले आहे.
ही फेरीबोट बांधणे, ती चालवणे, कर्मचारी नियुक्त करणे याचा सर्व खर्च कंपनीचा असेल. या फेरीचे शुल्क गोळा करण्यासाठी नदी परिवहन खाते कंत्राटदार नियुक्त करेल. प्रत्येक महिन्याच्या शेवटी खात्याच्या वरिष्ठ अधीक्षकांनी समाधानकारक सेवेचे प्रमाणपत्र दिल्यानंतरच खाते कंपनीला मासिक भाडे देईल आणि दरवर्षी या भाड्यात ५ टक्के वाढ होईल.
सहा महिन्यांत प्रवाशांसाठी सेवा होणार दाखल
सा-पेंद्र ते दिवाडी या मार्गावर ही फेरी सेवा ८ वर्षांच्या कंत्राटी पद्धतीने चालवण्यासाठी दिली जाईल आणि खात्याला योग्य वाटल्यास कंत्राट पुढील दोन वर्षांसाठी वाढवून दिले जाईल. कंपनीला १८० दिवसांच्या (सहा महिन्यांच्या) आत फेरीबोट तयार करून सेवेत दाखल करावी लागणार आहे.
