जैवविविधता मंडळाच्या अहवालातून धक्कादायक माहिती
पणजी : गोव्यातील बेडकांच्या सहा प्रजाती येत्या काळात इतिहासजमा होण्याच्या मार्गावर आहेत. यापैकी दोन प्रजाती नामशेष होण्याच्या मार्गावर, एक प्रजाती संकटात, एक गंभीर धोक्याजवळ आणि दोन प्रजाती असुरक्षित श्रेणीत आहेत. गोवा जैवविविधता मंडळाने तयार केलेल्या अहवालातून ही माहिती समोर आली आहे.
सकारात्मक गोष्ट म्हणजे गोव्यात नवीन उभयचर आणि सरपटणाऱ्या प्रजातींची नोंद केली जात आहे, अशी माहिती गोवा जैवविविधता मंडळाने तयार केलेल्या अहवालातून प्राप्त झाली आहे. गोवा जैवविविधता कृती आराखड्यासाठी डॉ. नितीन सावंत यांनी उभयचर आणि सरपटणाऱ्या प्रजातींच्या विश्लेषणानंतर ही माहिती सार्वजनिक केली आहे.
६ प्रजाती ‘रेड लिस्ट’मध्ये
राज्यात एकूण ३४ उभयचर प्रजातींची नोंद झाली आहे. त्यापैकी ६ प्रजाती 'निसर्ग संवर्धनासाठी आंतरराष्ट्रीय संघटन' (आययुसीएन) च्या धोकाग्रस्त प्रजातींच्या 'रेड लिस्ट'मध्ये समाविष्ट आहेत. यामध्ये नामशेष होण्याच्या मार्गावर- मलबार ट्री टोड आणि इंडियन डॉट फ्रॉग (दोन प्रजाती), गंभीर धोक्यात- आंबोली बुश फ्रॉग, धोक्याजवळ- मलबार फ्रॉग (एक प्रजाती) आणि असुरक्षित- बॉम्बे बबल-नेस्ट फ्रॉग आणि बॉम्बे नाईट फ्रॉग (दोन प्रजाती) यांचा समावेश आहे.
नवीन नोंदींमुळे दिलासा
दरम्यान, राज्यात एकूण ४० सरपटणाऱ्या नवीन प्रजातींची नोंद झाली आहे. यामध्ये गोवन स्लेंडर गॅको (पाल) आणि गोव्यातील बेडकाची एक नवीन प्रजाती अशा उभयचर आणि सरपटणाऱ्या नवीन प्रजातींची नुकतीच नोंद झाली आहे. नवीन शोध आणि नोंदींमुळे गोव्यातील उभयचर आणि सरपटणाऱ्या प्रजातींची संख्या दिवसेंदिवस वाढत आहे, असेही अहवालात नमूद करण्यात आले आहे.
