पंतप्रधानांच्या हस्ते प्रभू श्रीरामाच्या पुतळ्याचे अनावरण, तर इफ्फीचा दिमाखदार समारोप
पणजी : श्री संस्थान गोकर्ण पर्तगाळी जीवोत्तम मठाला ५५० वर्षे पूर्ण होत असल्याने सार्ध पंचशताब्दी महोत्सवाचे आयोजन करण्यात आले आहे. याअंतर्गत प्रभू श्रीरामाच्या पुतळ्याचे अनावरण पंतप्रधानांच्या हस्ते करण्यात आले. ५६ व्या भारतीय आंतरराष्ट्रीय चित्रपट महोत्सवाचा समारोप या आठवड्यात झाला. याशिवाय बायणातील दरोडाप्रकरणी सहा जणांना अटक करण्यात आली. या आठवड्यातील घडामोडींचा घेतलेला आढावा.
रविवार
रेल्वे दुपदरीकरणावरून कासावलीत तणाव
कासावली येथे भुयारी पादचारी मार्ग करण्यासाठी रेल विकास निगम लिमिटेडच्या अधिकाऱ्यांनी खासगी मालमत्तेतील माती हटवण्यासाठी यंत्रसाम्रगीसह जबरदस्तीने प्रवेश केल्यावरून तेथे रविवारी तणाव निर्माण झाला.
ह्युज प्रेसिझनच्या एमडीला अटक
विदेशातून बनावट कागदपत्राद्वारे १.११ कोटी रुपये किमतीचे दारूगोळ्याच्या बेकायदेशीर आयात केल्या प्रकरणात केंद्रीय महसूल गुप्तचर संचालनालयाच्या (डीआरआय) गोवा विभागाने वेर्णा येथील ह्युज प्रेसिझन मॅगझिन या कंपनीचे व्यवस्थापकीय संचालक संजय वेद्राक्ष सोनी आणि लॉजिस्टिक्स मॅनेजर जयेश पांडुरंग शेट्ये या दोघांना अटक करून कारवाई केली.
हणजूण हमीन हडप प्रकरणी मोहम्मद सुहैलला सशर्त जामीन
हणजूण येथील जमीन हडप प्रकरणातील मुख्य सूत्रधार मोहम्मद सुहैल उर्फ मायकल फर्नांडिस याला म्हापसा येथील प्रथमवर्ग न्यायालयाने ४० हजार रुपये हमी व अटींसह सशर्त जामीन मंजूर केला. मात्र, ईडीशी संबंधित अन्य एका प्रकरणात जामीन न मिळाल्याने सुहैलचा न्यायालयीन कोठडीतच मुक्काम राहणार आहे.
चिऱ्याची वाहतूक करणारा ट्रक कलंडून ड्रायव्हर जखमी
राष्ट्रीय महामार्गावरील खांडेपार येथील धोकादायक ठिकाणी पुन्हा एकदा अपघात झाला आहे. चिऱ्याची वाहतूक करणारा ट्रक कलंडून ड्रायव्हर जखमी होण्याची घटना रविवारी सकाळी घडली.
सोमवार
कोकणकन्या एक्सप्रेसमधून उतरण्याच्या प्रयत्नात प्रवासी पडला
मडगाव रेल्वेस्थानकावर एका ६६ वर्षीय प्रवाशाला रेल्वे सुरक्षा दलाच्या (आरपीएफ) जवानांनी मृत्यूच्या दाढेतून बाहेर काढले. सुटलेल्या कोकणकन्या एक्स्प्रेसमधून उतरण्याचा प्रयत्न करत असताना हा प्रवासी फलाट आणि रेल्वेच्या पोकळीत पडला होता. मात्र, तिथे तैनात असलेल्या दोन सतर्क जवानांनी प्रसंगावधान राखत त्यांना वाचवून जीवदान दिले.
गोव्यातील २९९७ शेतकऱ्यांना २.५३ कोटींची भरपाई; कृषी खात्याची मंजुरी
राज्यात ऑक्टोबरमध्ये पडलेल्या अवकाळी पावसामुळे पिकांच्या झालेल्या नुकसानीपोटी कृषी खात्याने भरपाई मंजूर केली आहे. ‘शेतकरी आधार निधी’ योजनेअंतर्गत राज्यातील २ हजार ९९७ शेतकऱ्यांना एकूण २ कोटी ५३ लाख रुपयांची आर्थिक मदत दिली जाणार आहे. कृषी खात्याने आतापर्यंत ५७७ हेक्टर शेतीचे नुकसान झाल्याचे स्पष्ट केले असून, अर्जांची छाननी प्रक्रिया वेगाने सुरू आहे.
राय मतदारसंघ आता एसटी महिलांसाठी राखीव
गोवा राज्य निवडणूक आयोगाने जिल्हा पंचायत निवडणुकीच्या आरक्षणात एक महत्त्वपूर्ण बदल केला आहे. दक्षिण गोव्यातील राय मतदारसंघ आता ‘महिला अनुसूचित जमाती’साठी राखीव करण्यात आला आहे. याबाबतचे सुधारित प्रतिज्ञापत्र आयोगाने सोमवारी मुंबई उच्च न्यायालयाच्या गोवा खंडपीठात सादर केले.
कामसूत्र कथा आणि ख्रिसमस सेलिब्रेशन’ विरुद्ध गुन्हा दाखल
गोव्यात २५ ते २८ डिसेंबर दरम्यान प्रस्तावित असलेल्या ‘कामसूत्रच्या कथा आणि ख्रिसमस सेलिब्रेशन’ या कार्यक्रमामुळे सामाजिक आणि धार्मिक भावना दुखावल्याप्रकरणी पणजी पोलिसांनी आयोजकांविरुद्ध गुन्हा दाखल केला आहे.
मंगळवार
चावडी काणकोण येथे सराफी दुकान लुटण्याचा प्रयत्न
काणकोण येथील चावडी भागात सराफी दुकान लुटण्याचा मोठा प्रयत्न पोलिसांच्या सतर्कतेमुळे फसला. प्रवीण मोहन वेर्णेकर यांच्या घराच्या कुंपणात असलेल्या दुकानावर ७ ते ८ चोरांनी डल्ला मारण्याचा प्रयत्न केला. मात्र, गस्तीवर असलेल्या पोलिसांनी वेळीच हस्तक्षेप केल्याने चोर पळून गेले.
गोवा राज्य सहकारी बँक संचालक मंडळाची निर्दोष मुक्तता
गोवा राज्य सहकारी बँकेच्या तत्कालीन संचालक मंडळाला न्यायालयाने मोठा दिलासा दिला आहे. दाम दुप्पट योजनेद्वारे बँकेचे १२.२६ कोटी रुपयांचे नुकसान झाल्याचे सिद्ध करण्यात सरकारी पक्ष अपयशी ठरला आहे. फसवणुकीचे पुरावे नसल्याने मुख्य न्यायदंडाधिकारी सारिका फळदेसाई यांनी तत्कालीन संचालक मंडळाची आरोपातून मुक्तता केली आहे.
कोलवाळ कारागृहाचे उपअधीक्षक गावकर यांची तडकाफडकी बदली
कोलवाळ कारागृहाचे उपअधीक्षक (जेलर) अनिल गावकर यांची तडकाफडकी बदली तुरूंग महानिरीक्षक कार्यालयात करण्यात आली आहे. याबाबतचा आदेश तुरूंग महानिरीक्षक केशव राम चौरासिया यांनी जारी केला आहे.
बुधवार
बायणातील दरोडाप्रकरणी सहा जणांना अटक
बायणातील दरोडाप्रकरणी पोलिसांनी मूळचे ओडिशाचे असेलेल्या सहा जणांना मुंबईतून अटक केली. त्यांच्याकडून चोरीचा काही ऐवज जप्त करण्यात आला आहे. अटक केलेल्यांमध्ये बायणा येथे भेळपुरी, पाणीपुरी, सामोसे विक्रीचा गाडा लावणाऱ्या मूळच्या ओडिशातील मुख्य सूत्रधाराचा समावेश असल्याचे समजते.
सांताक्रूझमधील घरफोडीतील चोराला अटक
उबो दांडो - सांताक्रूझ येथील फ्लॅटमधून २५ लाखांचा मुद्देमाल लंपास करणाऱ्या लोकेश सुतार या महाराष्ट्रातील सराईत चोराला जुने गोवा पोलिसांनी कर्नाटकातून अटक केली. पणजी येथील प्रथमवर्ग न्यायालयात हजर केले असता न्यायालयाने संशयिताला १० दिवसांची पोलीस कोठडी ठोठावली.
धड्यार-धारबांदोडा येथे विद्यार्थी बुडाला
क्रिकेटचा सराव करण्यासाठी जातो असे कुटुंबियांना सांगून नदीवर पोहण्यासाठी जाणे एका मुलाला महागात पडले. पाण्याचा अंदाज न आल्याने तो बुडाला. दुसऱ्याच्या हाताला झाडाची फांदी लागल्याने सुदैवाने तो बचावला. पाच मुले नदीवर पोहण्यासाठी गेली होती.
गुरुवार
जीपीएससीच्या गलथानपणामुळे ४ कनिष्ठ नागरी सेवा अधिकारी बडतर्फ
कनिष्ठ सेवा अधिकाऱ्यांच्या भरतीमध्ये झालेल्या कथित गैरव्यवहाराविरोधात दाखल एफआयआर रद्द करण्याच्या उच्च न्यायालयाच्या आदेशाला सर्वोच्च न्यायालयाने स्थगिती दिल्यानंतर सरकारने चार अधिकाऱ्यांना सेवेतून बडतर्फ केले. या अधिकाऱ्यांना बडतर्फ करण्याचा आदेश कार्मिक खात्याने जारी केला. कनिष्ठ सेवा अधिकाऱ्यांच्या भरतीतील अनियमिततेचा फटका अखेर नियुक्त झालेल्या चार अधिकाऱ्यांना बसला आहे.
इफ्फीत अमीर खानची उपस्थिती
इफ्फीतील‘इन कॉन्व्हर्सेशन विथ’ या सत्रात प्रसिद्ध समीक्षक बरद्वाज रंगम यांनी आमिर खान यांची मुलाखत घेतली. माझा चित्रपट प्रेक्षकांना आवडणे हाच माझ्यासाठी सर्वात मोठा सन्मान असल्याचे अमीर खान याने सांगितले.
शुक्रवार
पंतप्रधानांच्या हस्ते प्रभू श्रीरामाच्या पुतळ्याचे अनावरण
श्री संस्थान गोकर्ण पर्तगाळी जीवोत्तम मठाला ५५० वर्षे पूर्ण होत असल्याने सार्ध पंचशताब्दी महोत्सवाचे आयोजन करण्यात आले आहे. याअंतर्गत शुक्रवारी मठाने उभारलेल्या ७७ फूट उंच कांस्य धातूच्या प्रभू श्रीरामाच्या पुतळ्याचे अनावरण पंतप्रधानांच्या हस्ते करण्यात आले.
५६व्या इफ्फीची सांगता : रजनीकांत यांचा विशेष गौरव
५६ व्या भारतीय आंतरराष्ट्रीय चित्रपट महोत्सवात (इफ्फी) प्रतिष्ठेचा सुवर्ण मयूर पुरस्कार अॅश मेफेयर दिग्दर्शित ‘स्किन ऑफ युथ’ या व्हिएतनाम, सिंगापूर आणि जपान या तीन देशांची कलाकृती असणाऱ्या चित्रपटाने पटकावला. तर यंदाचे ‘आयसीएफटी-युनेस्को गांधी’ पदक एरिक स्वेसन दिग्दर्शित ‘सेफ हाऊस’ या चित्रपटाला मिळाले. शुक्रवारी इफ्फीचा समारोप सोहळा बांबोळी येथील डॉ. श्यामाप्रसाद मुखर्जी स्टेडियमवर पार पडला. अभिनेते रजनीकांत यांना चित्रपट क्षेत्रात ५० वर्षे योगदान दिल्याबद्दल सन्मानित करण्यात आले.
मुळगाव येथील भीषण अपघातात दोघा युवकांचा मृत्यू
व्हाळशी डिचोली येथील औद्योगिक प्रशिक्षण केंद्रातील डिझेल मेकॅनिक विभागात शिकणारे रेवोडा (बार्देश) येथील दोघे २० वर्षीय युवक भरधाव वेगाचे बळी ठरले. आयटीआयमधून रेवोडाकडे जात असताना तांबडारस्ता मुळगाव येथे एका अॅक्टिवा स्कूटरला ओव्हरटेक करताना पाठीमागून धडक बसल्याने मोटरसायकलवरील दोघेही युवक पडून जागीच मृत झाले.
शनिवार
मालमत्तेच्या वादातून महिलेवर लोखंडी रॉडने हल्ला
वार्का येथे मालमत्तेच्या जुन्या वादातून लासिमा गाल्डिनो नावाच्या महिलेवर लोखंडी रॉडने प्राणघातक हल्ला करून त्यांना गंभीर जखमी करण्यात आले. याप्रकरणी संशयित ज्यो परेरा याच्याविरोधात कोलवा पोलिसांनी खुनाचा प्रयत्न आणि चोरी केल्याप्रकरणी गुन्हा नोंद केला आहे.
जि. पं. क्षेत्रात आचारसंहिता लागू
जिल्हा पंचायत निवडणुकीचे वेळापत्रक शनिवारी जाहीर करण्यात आले. २० डिसेंबर रोजी राज्यातील ५० जिल्हा पंचायत मतदारसंघांसाठी निवडणूक होणार आहे. १ ते ९ डिसेंबरपर्यंत अर्ज सादर करता येतील. अर्ज मागे घेण्याची तारीख ११ डिसेंबर असून त्याच दिवशी दुपारी उमेदवारांची यादी जाहीर केली जाईल. २२ डिसेंबर रोजी निकाल जाहीर केला जाणार.
लक्षवेधी
जुने गोवा येथील सेंट फ्रान्सिस झेवियरच्या दर्शनासाठी पदयात्रेची गेल्या अनेक दशकांची परंपरा जपताना कोल्हापूर, गडहिंग्लज, इचलकरंजी, बेलेवाडी , बेळगाव आणि इतर भागातील यात्रेकरूंनी शुक्रवारी आपली यात्रा सुरू केली.
आराडी, कांदोळी येथे वातानुकूलीत संच दुरूस्त करताना इमारतीच्या तिसऱ्या मजल्यावरून पाय घसरून खाली कोसळल्याने डी. डिसोझा (६१, रा. बिठ्ठोण पर्वरी) हा एसी मॅकॅनिक गंभीर जखमी झाला होता. त्याच्यावर गोमेकॉत उपचार सुरू असताना त्याचा मृत्यू झाला.
पडोसे सत्तरीत गेल्या महिन्यात गोळीबारात मोहम्मद अख्तर आलम हा कामगार जखमी झाला होता. ही घटना ताजी असताना पुन्हा त्याच ठिकाणी गोळीबार झाल्याची घटना घडली. या प्रकरणी वाळपई पोलिसांनी एअरगन कारतूस आणि एक एअरगन जप्त केली असून एका व्यक्तीला चौकशीसाठी ताब्यात घेतले आहे.
गोवा सरकारने दोनापावला येथे आंतरराष्ट्रीय दर्जाचे ‘कन्व्हेंशन सेंटर’ आणि ‘कन्व्हेंशन हॉटेल’ उभारण्याचा निर्णय घेतला आहे. या महत्त्वाकांक्षी प्रकल्पात ३०० खोल्यांचे तारांकित हॉटेल, मल्टिप्लेक्स आणि भव्य परिषद सभागृहाचा समावेश असेल.
सुकूर पर्वरी येथील खूनी हल्ला प्रकरणी संशयित आरोपी दिनेश दुर्गाप्पा मल्लीनमणी व संतोष दुर्गाप्पा मल्लीनमणी (रा. २० कलमी वसाहत, सुकूर) या सख्ख्या भावांवर आरोप निश्चितीचे आदेश मेरशी फास्ट ट्रॅक न्यायालयाने दिले आहेत.
