व्यस्त रस्त्यावर वाहतूक विस्कळीत; यांत्रिकी बिघाडामुळे आग लागल्याचा संशय
वास्को: चिखली पंचायत सिग्नलजवळ सोमवारी सकाळी एका दुचाकीला अचानक आग लागल्याने परिसरात काही काळ गोंधळाचे वातावरण निर्माण झाले होते. या घटनेमुळे व्यस्त रस्त्यावरील वाहतूक काही प्रमाणात मंदावली होती. सुदैवाने, या दुर्घटनेत दुचाकी चालक सुखरूप बचावला आहे, मात्र त्याची दुचाकी पूर्णपणे जळून खाक झाली.
प्रत्यक्षदर्शींनी दिलेल्या माहितीनुसार, दुचाकीतून अचानक धूर आणि त्यानंतर ठिणग्या बाहेर पडू लागल्या. परिसरातील नागरिकांनी तत्काळ अग्निशमन दलाला याची माहिती दिली. तो पर्यंत दुचाकी भस्मसात झाली होती. वाहतूक पोलिसांनी आग विझवण्याच्या प्रक्रियेदरम्यान रस्त्यावरील वाहतुकीचे नियमन केले, ज्यामुळे मोठी कोंडी टळली. या घटनेत कोणतीही जीवितहानी झाली नाही.
आग लागण्याचे नेमके कारण अद्याप स्पष्ट झालेले नाही. यांत्रिकी बिघाड, अति उष्णता किंवा शॉर्ट सर्किटमुळे ही आग लागली असावी, असा प्राथमिक अंदाज अधिकाऱ्यांनी व्यक्त केला आहे. अधिकाऱ्यांनी वाहनधारकांना अशा घटना टाळण्यासाठी त्यांच्या वाहनांची नियमित देखभाल करण्याची विनंती केली आहे.
