म्हणाले- मगो, भाजपतर्फे किंवा अपक्ष म्हणून मैदानात उतरणार
पणजी: मगो (मगोप)-भाजप युतीचा उमेदवार म्हणून किंवा अपक्ष म्हणून फोंडा मतदारसंघाची पोटनिवडणूक मी लढवणारच, अशी ठाम भूमिका डॉ. केतन भाटीकर यांनी घेतली आहे. मी अजून मगो पक्षात असून माझे नेते सुदीन ढवळीकर माझा गळा कापणार नाही, असा विश्वास मला आहे, असेही ते म्हणाले. प्रुडंट मीडिया वाहिनीला दिलेल्या 'हेड ऑन' मुलाखतीत डॉ. भाटीकर यांनी हे मत व्यक्त केले.
फोंड्याचे आमदार आणि कृषीमंत्री रवी नाईक यांच्या निधनामुळे येत्या सहा महिन्यांत या मतदारसंघात पोटनिवडणूक होणार आहे, त्यामुळे उमेदवारीच्या चर्चेला आता ऊत आला आहे.
रितेश नाईक यांना बिनशर्त पाठिंब्यावर भाष्य
यापूर्वी मगोचे अध्यक्ष दीपक ढवळीकर यांनी रवी नाईक यांचे पुत्र रितेश नाईक यांना भाजपने उमेदवारी दिल्यास बिनशर्त पाठिंबा देण्याची घोषणा केली होती. यावर भाष्य करताना डॉ. भाटीकर म्हणाले की, फोंडा पोटनिवडणुकीत कोणताही उमेदवार बिनशर्त निवडून येणार नाही. देशात लोकशाही आहे. फोंडा मतदारसंघातील जनतेला आपला आमदार निवडण्याचा अधिकार आहे. त्यामुळे निवडणूक होऊ द्या. सर्वोत्कृष्ट उमेदवार निवडून येईल. मीच नव्हे, इतरांनाही निवडणूक लढवण्याचा अधिकार आहे, असे त्यांनी स्पष्ट केले.
भाजपच्या निर्णयावर भाष्य
भारतीय जनता पक्षाने (भाजप) अद्याप उमेदवारी जाहीर केलेली नाही. प्रदेशाध्यक्ष दामू नाईक यांनीही रितेश यांना उमेदवारी मिळेल, असे जाहीर केलेले नाही. उमेदवार निवडण्याची पक्षाची एक प्रक्रिया असते, त्यानुसार योग्य उमेदवार निवडला जाईल, असे दामू नाईक यांनी म्हटले आहे याचाही उल्लेख भातीकर यांनी केला.
रवी नाईक यांच्याशी कितीही मतभेद असले तरी मला त्यांच्याबद्दल आदर आहे, असे डॉ. भाटीकर म्हणाले. तसेच, मगो नेते सुदीन ढवळीकर यांच्याबद्दल मला फार आदर आहे. अपक्ष लढण्याचा विचार केला तरी त्यांना नमस्कार करूनच मी उमेदवारी अर्ज दाखल करीन, असेही त्यांनी स्पष्ट केले.
