अग्निशमन दलाने मिळवले आगीवर नियंत्रण
पणजी : ला कांपाल कॉलनी - मिरामार येथे गुरुवारी पहाटे एका घराला आग लागली. पणजी अग्निशमन दलाने तातडीने आग आटोक्यात आणल्याने मोठा अनर्थ टळला. यात २ लाख रुपयांचे नुकसान झाले असून १० लाख रुपयांची मालमत्ता वाचविण्यास दलाला यश आले. पणजी पोलिसांनी घटनेची नोंद केली.
अग्निशमन दलाने दिलेल्या माहितीनुसार, गुरुवार, २३ रोजी पहाटे ५.१८ वाजता मिरामार येथील ला कांपाल कॉलनीतील एका घराला आग लागल्याची माहिती अग्निशमन दलाच्या नियंत्रण कक्षाला मिळाली होती. ही माहिती कक्षाने पणजी अग्निशमन दलाला दिली. त्यानुसार, पणजी फायर स्टेशन ऑफिसर रुपेश सावंत यांच्या मार्गदर्शनाखाली लिडींग फायर फायटर येसो आमोणकर, ड्राइव्हर ऑपरेटर जितेंद्र मयेकर, फायर फायटर दिप्तेश पै, ओमकार राणे, मंजुनाथ होसमानी व इतर जवानांनी घटनास्थळी धाव घेतली. त्यानंतर आग इतर ठिकाणी पसरू नये म्हणून अतिरिक्त मदत मागविण्यात आली. दरम्यान, त्यानुसार, मुख्यालयाचा एक बंब घटनास्थळी दाखल झाला.
अग्निशमन दलाने त्वरित आगीवर नियंत्रण मिळवल्यामुळे मोठा अनर्थ टळला. यावेळी सदर घराचा एका खोलीत आग लागली होती. ही आग सकाळी ७.५७ वाजता नियंत्रणात आणली. घरातील २ लाख रुपयांचे नुकसान झाले तर दलाने १० लाख रुपयांची मालमत्ता वाचविण्यात यश मिळविले. सदर आग शॉर्ट सर्किट मुळे लागल्याची शक्यता अग्निशमन दलाने व्यक्त केला. याप्रकरणी पणजी पोलिसांनी आगीची दुर्घटना म्हणून नोंद करून कारवाई सुरू केली आहे.
