पावसामुळे वन खात्याला ड्रोनद्वारे नजर ठेवण्यात येताहेत अडचणी
पणजी: सिंधुदुर्ग जिल्ह्याच्या सीमेवरून गोव्याच्या हद्दीत आलेला ‘ओंकार’ नावाचा हत्ती सध्या कडशी - मोपा येथेच तळ ठोकून आहे. गोव्यातून त्याला हाकलून लावण्याचे प्रयत्न सुरू असले तरी, मूळ कळपात त्याला स्वीकारले जात नसल्याने त्याची ‘इकडे आड, तिकडे विहीर’ अशी अवस्था झाली आहे.
ओंकार जरी बहुतांश वेळ रानात भटकत असला, तरी अधूनमधून तो कडशीतील बागायतीचे नुकसान करत आहे. ग्रामस्थांनी दिलेल्या माहितीनुसार, तो कडशी नदीत मनसोक्तपणे डुंबण्याचा आनंदही घेत आहे. गोव्याची हद्द ओलांडूनही तो पुन्हा परत आल्याने ग्रामस्थ धास्तावले आहेत.
या हत्तीवर वन खात्याच्या पथकाने ड्रोनच्या माध्यमातून लक्ष ठेवले आहे. मात्र, पावसामुळे ड्रोनचा सिग्नल मिळण्यात अडचणी येत असल्याने त्याच्यावर नजर ठेवणेही कठीण बनले आहे. वन विभागाचे अधिकारी जीस वर्की यांनी सांगितले की, ओंकार हत्ती पुन्हा माघारी फिरल्याने त्याला सहजासहजी हाकलून लावता येणार नाही. मात्र वन खात्याकडून त्याला पुन्हा परत पाठवण्याचे प्रयत्न सुरूच आहेत.
