चीनवर ७-० ने मात : विजेतेपदासाठी दक्षिण कोरियाशी लढत
राजगीर : भारतीय पुरुष हॉकी संघाने आशिया कप २०२५ च्या अंतिम फेरीत धडक मारली आहे. राजगीर येथे सुरू असलेल्या या स्पर्धेत सुपर-४ फेरीच्या आपल्या तिसऱ्या आणि शेवटच्या सामन्यात भारतीय संघाने चीनचा ७-० असा धुव्वा उडवला आणि नवव्यांदा अंतिम फेरीत प्रवेश केला. या विजयासह, भारतीय संघाने या संपूर्ण स्पर्धेत एकही सामना न गमावता अंतिम फेरीपर्यंतचा प्रवास पूर्ण केला आहे. भारतीय संघ सर्वाधिक वेळा अंतिम सामना खेळणारा संघ ठरला आहे, पण विजेतेपदासाठी त्यांची लढत सर्वाधिक वेळा (५) हा किताब जिंकणाऱ्या दक्षिण कोरियाशी होणार आहे.
बिहारच्या राजगीर येथे सुरू असलेल्या या स्पर्धेत भारताने पहिल्या दिवसापासूनच आपले वर्चस्व कायम राखले होते. पूल स्टेजमध्ये अव्वल स्थान पटकावत संघाने सुपर-४ फेरीत प्रवेश केला. या फेरीतही भारतीय संघाने उत्कृष्ट कामगिरी करत ३ सामन्यांत २ विजयांसह ७ गुण मिळवले आणि अव्वल स्थान मिळवले. यामुळे त्यांना विजेतेपदाच्या लढतीसाठी थेट प्रवेश मिळाला.या स्पर्धेत भारतीय संघाचा पहिला सामना चीनशीच झाला होता, ज्यात चीनने भारताला चांगली टक्कर दिली होती. त्यावेळी भारतीय संघाने खूप संघर्ष करून ४-३ असा विजय मिळवला होता. मात्र, या वेळी प्रशिक्षक क्रेग फुल्टन यांच्या संघासमोर चीनचे काहीच चालले नाही. सामन्याच्या सुरुवातीपासूनच भारतीय खेळाडूंनी आक्रमक खेळ केला, ज्याचा परिणाम म्हणून केवळ ७ मिनिटांतच स्कोअर २-० झाला. पहिला गोल शैलानंद लाकडाने केला, तर दुसरा गोल दिलप्रीत सिंगने केला. त्यानंतर १८व्या मिनिटाला मनदीपच्या गोलमुळे भारताने पहिल्या हाफमध्ये ३-० अशी आघाडी घेतली.
दुसऱ्या हाफमध्ये भारताने अधिक नियंत्रित हल्ला करत ४ गोल डागले. राजकुमार पाल आणि सुखजीत सिंग यांनी दीड मिनिटातच २ गोल केले, तर अभिषेकने शेवटचे २ गोल करून संघाला ७-० असा एकतर्फी विजय मिळवून दिला. अशा प्रकारे, भारतीय संघाने पूल स्टेज आणि सुपर-४ मध्ये एकूण ६ सामने खेळले, ज्यात ५ विजय मिळवून अंतिम फेरीत आपली जागा निश्चित केली. भारतीय संघ या स्पर्धेत एकही सामना हरलेला नाही.
कोरियासोबत हिशोब चुकता करण्याची संधी
भारतीय संघाला या ६ सामन्यांपैकी फक्त एकच सामना जिंकता आला नाही, कारण तो २-२ असा बरोबरीत सुटला होता. ज्या संघासोबत हा सामना बरोबरीत सुटला, आता त्याच संघाशी भारत अंतिम सामन्यात भिडणार आहे. कोरियाने शेवटच्या सामन्यात मलेशियावर ४-३ असा विजय मिळवून अंतिम फेरी गाठली. कोरियाने सर्वाधिक ५ वेळा हा किताब जिंकला आहे, तर भारताने ३ वेळा विजेतेपद पटकावले आहे. आता भारताकडे हा हिशोब बरोबरीचा करण्याची आणि चौथ्यांदा आशियाई विजेता बनण्याची संधी आहे.
