गोवा उद्योग विकास महामंडळाच्या दोन फील्ड मॅनेजरवर निलंबनाची कारवाई

दोन अधिकाऱ्यांवर निलंबनाची कारवाई

निविदा प्रक्रियेत हितसंबंध आणि निकृष्ट दर्जाच्या बांधकामाच्या आरोपावर

पणजी : कामातील गंभीर निष्काळजीपणामुळे गोवा औद्योगिक विकास महामंडळाने (जीआयडीसी) दोन फील्ड मॅनेजरवर निलंबनाची कारवाई केली आहे. या अधिकाऱ्यांविरोधात सध्या चौकशी सुरू असून, चौकशी पूर्ण झाल्यानंतर पुढील शिस्तभंगात्मक कारवाई करण्यात येणार असल्याची माहिती जीआयडीसीच्या वरिष्ठ अधिकाऱ्यांनी दिली.

फील्ड मॅनेजर विवेश तुयेकर यांच्या कुटुंबातील सदस्याने रस्त्याच्या बांधकामासाठी जीआयडीसीने जाहीर केलेल्या निविदेमध्ये सहभाग घेतला होता आणि ते कंत्राट त्यांच्या कुटुंबीयालाच देण्यात आले. जीआयडीसीमध्ये कार्यरत असलेल्या अधिकाऱ्याच्या कुटुंबीयांना विभागाच्या कंत्राटात सहभागी होण्यास मनाई करणारा केंद्रीय नागरी सेवा नियम क्रमांक १६ आहे. या नियमाचे उल्लंघन झाल्यामुळे विवेश तुयेकर यांच्यावर कारवाई करण्यात आली.

होंडा आयडीसी प्रकल्पातील फील्ड मॅनेजर मोहम्मद अन्वर बेग यांच्या देखरेखीखाली झालेल्या रस्त्याच्या कामाचा दर्जा अत्यंत सुमार असल्याचे स्पष्ट झाले आहे. पहिल्याच पावसात या रस्त्यावर खड्डे पडले आणि मोठ्या प्रमाणावर खराबी झाली. दर्जावर योग्य देखरेख न केल्यामुळे बेग यांच्यावर निलंबनाची कारवाई करण्यात आली आहे.

जीआयडीसीने सत्तरीतील होंडा औद्योगिक वसाहतीमध्ये रस्त्याच्या कामासाठी जाहीर केलेली निविदा 'विवेश कन्स्ट्रक्शन' या कंपनीला मिळाली होती. या कंपनीची मालकी विवेश तुयेकर यांच्या आईकडे असल्याचे स्पष्ट झाले आहे. याच कंपनीने बांधलेला रस्ता पहिल्याच पावसात खराब झाला. त्या कामाच्या देखरेखीची जबाबदारी मोहम्मद अन्वर बेग यांच्याकडे होती. त्यांनी देखरेखीत हलगर्जीपणा केल्यामुळे कामाचा दर्जा घसरला. ही दोन प्रकरणे परस्पर संबंधित असल्याने दोन्ही अधिकाऱ्यांवर निलंबनाची कारवाई करत चौकशी सुरू करण्यात आली आहे, असे प्रवीमल अभिषेक यांनी स्पष्ट केले.

दोन्ही अधिकाऱ्यांविरुद्ध सध्या जीआयडीसीतर्फे चौकशी सुरू आहे. चौकशी अहवालातील निष्कर्षांनंतर पुढील शिस्तभंगात्मक कारवाई करण्यात येईल. महामंडळाचे व्यवस्थापकीय संचालक प्रवीमल अभिषेक यांनी स्पष्ट केले की, अशा प्रकरणांमध्ये महामंडळ कठोर भूमिका घेते आणि कोणत्याही प्रकारच्या गैरप्रकारास बघकरी वागणूक दिली जाणार नाही.