गोव्याच्या सीमेवर आता ‘जीओव्हीए’चा जागता पहारा!

🚗 गोव्यातील वाहन तपासणीत क्रांती

डॅशबोर्ड कॅमेऱ्यांद्वारे स्वयंचलित वाहन तपासणी प्रणाली सुरू

पणजी : गोव्यात येणाऱ्या बाह्य वाहनांची तपासणी आता सीमांवरील डॅशबोर्ड कॅमेऱ्यांद्वारे स्वयंचलितपणे होणार असून, अवैध कागदपत्र आढळल्यास 'वाहन अ‍ॅप'वरून थेट चलन फाडले जाणार आहे. गोव्यात दाखल होणाऱ्या बाह्य राज्यातील वाहनांच्या कागदपत्रांची तपासणी आता अधिक वेगवान आणि स्वयंचलित होणार आहे.

सीमेवर प्रवेश करताच वाहनाच्या नंबरप्लेटचे स्कॅनिंग होते आणि तत्काळ आरसी, इन्शुरन्स व पीयूसी संबंधित डेटाबेसशी जोडून तपासले जाते. सर्व कागदपत्रे वैध असल्यास वाहनाला थेट गोव्यात प्रवेश दिला जातो. ही तपासणी फक्त चेकपोस्टवरच केली जात असल्यामुळे, यानंतर रस्त्यात कुठेही पोलिसांना त्या वाहनाची कागदपत्रे तपासण्यासाठी थांबवण्याची गरज भासणार नाही.

बाहेरून येणाऱ्या पर्यटकांच्या वाहनांना वारंवार थांबवून तपासणी केल्याने प्रवाशांमध्ये नाराजी पसरली होती. या पार्श्वभूमीवर आमदार मायकल लोबो यांच्यासह काही आमदारांनी एकदाच तपासणी करून वाहनांना पुढे जाऊ देण्याची मागणी केली होती. पोलीस महासंचालकांशी झालेल्या बैठकीनंतर ही मागणी मान्य करण्यात आली आहे.

ही व्यवस्था सध्या प्रायोगिक तत्त्वावर राबवण्यात येत असून, प्रणालीमध्ये कोणतीही त्रुटी आढळली नाही, तर ही प्रणाली कायमस्वरूपी लागू केली जाईल, असे अधिकाऱ्यांनी स्पष्ट केले आहे. यामुळे गोव्यात प्रवेश करणाऱ्या सर्व वाहनांची कागदपत्रे वैध असल्याची खात्री होईल.