लीड्स कसोटीतील पराभवानंतरही ऋषभ पंतची ऐतिहासिक कामगिरी

बंगळुरू : भारताला इंग्लंडविरुद्ध लीड्स कसोटी सामन्यात ५ गडी राखून पराभव पत्करावा लागला असला तरी, या सामन्यात भारताचा स्टार यष्टिरक्षक-फलंदाज ऋषभ पंतने आपल्या खेळाचे वर्चस्व सिद्ध केले. त्याने कसोटीच्या दोन्ही डावांमध्ये शतक झळकावत एक दुर्मीळ विक्रम आपल्या नावावर केला. या शानदार कामगिरीमुळे आयसीसीने जाहीर केलेल्या ताज्या कसोटी क्रमवारीत पंतने मोठी झेप घेतली आहे. विशेष म्हणजे, ऋषभ पंतने यावेळी आयसीसी कसोटी क्रमवारीत जी कामगिरी केली आहे, ती भारताचा महान कर्णधार आणि यष्टिरक्षक महेंद्रसिंग धोनीलाही त्याच्या संपूर्ण कसोटी कारकिर्दीत साध्य करता आली नव्हती.
लीड्स कसोटीत पंतची दमदार शतके
इंग्लंडविरुद्ध लीड्स येथे खेळल्या गेलेल्या कसोटी सामन्याच्या पहिल्या डावात ऋषभ पंतने १७८ चेंडूंमध्ये १३४ धावांची धडाकेबाज खेळी केली, ज्यात १२ चौकार आणि ६ उत्तुंग षटकारांचा समावेश होता. त्यानंतर, दुसऱ्या डावातही त्याने धावांचा पाऊस पाडला. दुसऱ्या डावात पंतने १४० चेंडूंमध्ये ११८ धावा केल्या, ज्यात १५ चौकार आणि ३ षटकारांचा समावेश होता. या दोन शतकांसह, पंत हा कसोटी सामन्याच्या दोन्ही डावांत शतक झळकावणारा भारताचा सातवा फलंदाज ठरला आहे.
आयसीसी क्रमवारीत ऐतिहासिक झेप
या दोन अविस्मरणीय शतकांच्या जोरावर ऋषभ पंतने आयसीसी कसोटी क्रमवारीतही आपली छाप पाडली आहे. या सामन्यापूर्वी पंत आयसीसी कसोटी क्रमवारीत आठव्या स्थानावर होता. आता त्याला एका स्थानाचा फायदा झाला असून, तो थेट सातव्या स्थानावर पोहोचला आहे. या सामन्यापूर्वी पंतची रेटिंग ७३९ होती, ती आता वाढून ८०० झाली आहे. उर्वरित चार कसोटी सामन्यांत पंत आणखी काही मोठ्या खेळी करू शकला, तर त्याला क्रमवारीत आणखी फायदा होऊ शकतो.
८०० रेटिंग मिळवणारा पहिला भारतीय यष्टिरक्षक-फलंदाज
- ऋषभ पंतने केलेली सर्वात उल्लेखनीय कामगिरी म्हणजे, तो आयसीसी कसोटी क्रमवारीत ८०० रेटिंग पॉइंट्स मिळवणारा भारताचा पहिला यष्टिरक्षक-फलंदाज ठरला आहे.
- यापूर्वी भारताच्या कोणत्याही यष्टिरक्षकाने कसोटी क्रमवारीत इतके रेटिंग पॉइंट्स मिळवले नव्हते.
- महेंद्रसिंग धोनीलाही त्याच्या कसोटी कारकिर्दीत कधीही ८०० रेटिंग पॉइंट्स मिळवता आले नव्हते. धोनीची सर्वोत्तम क्रमवारी १९ वी राहिली होती. त्याने आपल्या कारकिर्दीत ६६१ रेटिंग पॉइंटपर्यंत मजल मारली होती.
- धोनीने कसोटी क्रिकेटमध्ये ६ शतके झळकावली होती, हा विक्रम ऋषभ पंतने मागील सामन्यातच मोडून काढला आहे. आता पंत यापुढे जितका पुढे जाईल, तितके नवे विक्रम प्रस्थापित होत जातील.