अ मेरिकेने शिक्षण घेण्यासाठी आलेल्या भारतीय आणि इतर परदेशी विद्यार्थ्यांना अत्यंत कठोर इशारा दिला आहे. अमेरिकेतील कोणत्याही शिक्षण संस्थेत शिकणाऱ्या परदेशी विद्यार्थ्याने जर नियमितपणे वर्गांना दांडी मारली किंवा कोणतीही पूर्वसूचना न देता आपले शिक्षण अचानक थांबवले, तर त्याचा विद्यार्थी व्हिसा त्वरित रद्द केला जाऊ शकतो, असे अमेरिकेने स्पष्टपणे बजावले आहे.
अमेरिकेमध्ये अवैधपणे होणारी घुसखोरी रोखण्यासाठी प्रशासनाकडून सुरू असलेल्या व्यापक कारवाईचा हा एक भाग आहे. शिक्षण व्हिसाचा गैरवापर करून अनेक परदेशी नागरिक अमेरिकेत बेकायदेशीरपणे वास्तव्य करतात, असा संशय अमेरिकन प्रशासनाला आहे. त्यामुळे आता शिक्षण संस्थांना त्यांच्याकडील परदेशी विद्यार्थ्यांच्या उपस्थिती आणि शैक्षणिक प्रगतीवर काटेकोरपणे लक्ष ठेवण्याचे निर्देश देण्यात आले आहेत.
अमेरिकेच्या नव्या नियमानुसार, जर कोणताही परदेशी विद्यार्थी कोणत्याही ठोस कारणाशिवाय नियमितपणे वर्गात गैरहजर राहिला किंवा त्याने अचानक शिक्षण सोडले, तर शिक्षण संस्थेने त्वरित याची माहिती अमेरिकेच्या इमिग्रेशन विभागाला देणे बंधनकारक असेल. त्यानंतर त्या विद्यार्थ्याचा व्हिसा रद्द करण्याची प्रक्रिया सुरू केली जाईल आणि त्याला अमेरिकेतून परत पाठवले जाऊ शकते.
या कठोर भूमिकेमुळे अमेरिकेत शिक्षण घेऊ इच्छिणाऱ्या किंवा सध्या शिक्षण घेत असलेल्या भारतीय विद्यार्थ्यांसह जगभरातील परदेशी विद्यार्थ्यांमध्ये चिंतेचे वातावरण निर्माण होण्याची शक्यता आहे. विद्यार्थ्यांना आता त्यांच्या अभ्यासक्रमावर आणि वर्गातील उपस्थितीवर अधिक लक्ष केंद्रित करावे लागणार आहे. कोणत्याही अपरिहार्य कारणामुळे गैरहजर राहिल्यास त्यांनी त्वरित आपल्या शिक्षण संस्थेशी संपर्क साधून योग्य ती माहिती देणे आवश्यक आहे, जेणेकरून त्यांच्या व्हिसावर कोणताही नकारात्मक परिणाम होणार नाही.
अमेरिकेचे हे पाऊल अवैध इमिग्रेशन रोखण्याच्या उद्देशाने उचलले असले, तरी याचा थेट परिणाम प्रामाणिकपणे शिक्षण घेण्यासाठी आलेल्या विद्यार्थ्यांवर होण्याची शक्यता आहे. त्यामुळे भारतीय विद्यार्थ्यांनी अमेरिकेतील शिक्षण संस्थांच्या नियमांचे आणि व्हिसाच्या अटींचे पालन करणे अत्यंत महत्त्वाचे आहे. या निर्णयामुळे अमेरिकेत येण्याची तयारी करणाऱ्या लाखो विद्यार्थ्यांमध्ये चिंता निर्माण झाली आहे. तज्ज्ञांचा असा विश्वास आहे की जर हा ट्रेंड असाच चालू राहिला तर अमेरिकेचे जागतिक शैक्षणिक नेतृत्व धोक्यात येऊ शकते.
-सुदेश दळवी
