मध्य प्रदेश भाजपचे मंत्री विजय शहांना न्यायालयाचा दणका
भोपाळ : मध्य प्रदेशचे आदिवासी व्यवहार मंत्री विजय शहा यांनी कर्नल सोफिया कुरेशी यांच्याबद्दल केलेल्या वादग्रस्त विधानामुळे ते वादाच्या भोवऱ्यात सापडले आहेत. त्यांच्या विधानावर देशभरातून तीव्र टीका होत असून, आता मध्य प्रदेश उच्च न्यायालयाने या प्रकरणाची स्वतःहून दखल घेतली आहे. न्यायमूर्ती अतुल श्रीधर यांच्या खंडपीठाने राज्याचे पोलीस महासंचालक (डीजीपी) यांना विजय शहा यांच्याविरुद्ध चार तासांच्या आत एफआयआर नोंदवण्याचे आदेश दिले आहेत. या प्रकरणाची पुढील सुनावणी गुरुवारी सकाळी होणार आहे. न्यायालयाने राज्याचे महाधिवक्ता प्रशांत सिंह यांना या संदर्भात स्पष्ट निर्देश दिले आहेत.
वादग्रस्त विधान आणि माफी
मंत्री विजय शहा यांनी एका सार्वजनिक कार्यक्रमात वादग्रस्त विधान करताना म्हटले होते, ‘ज्यांनी आमच्या मुलींच्या मंगळसूत्रांवर (सिंदूर) हल्ला केला, आम्ही त्यांच्या बहिणींना पाठवून त्यांना मारहाण केली.’ हे विधान करताच समाजमाध्यमांमध्ये आणि राजकीय वर्तुळात तीव्र प्रतिक्रिया उमटल्या. त्यानंतर त्यांनी स्पष्टीकरण देत म्हटले, ‘कर्नल सोफिया यांच्याबद्दल मला खऱ्या बहिणीपेक्षा अधिक आदर आहे. मी त्यांना सलाम करतो. जर माझ्या शब्दांमुळे कोणाच्या भावना दुखावल्या असतील, तर मी दहा वेळा माफी मागण्यास तयार आहे.’
काँग्रेसकडून तीव्र निषेध
विजय शहा यांनी आपल्या विधानाबद्दल माफी मागितली असली, तरी त्यांच्यावरचा रोष अद्याप शांत झालेला नाही. काँग्रेसकडून या विधानाचा तीव्र निषेध केला जात आहे. काँग्रेस नेते जितू पटवारी आणि इतर कार्यकर्ते श्यामला हिल्स पोलीस ठाण्यात पोहोचले आणि त्यांनी विजय शहा यांच्यावर देशद्रोहाचा गुन्हा दाखल करण्याची मागणी केली. काँग्रेसकडून त्यांच्या राजीनाम्याचीही मागणी होत आहे.
भाजपची भूमिका :
भाजपचे प्रदेशाध्यक्ष व्ही.डी. शर्मा यांनी सांगितले की पक्ष नेतृत्व या प्रकरणात संवेदनशील आहे. विजय शहा यांना पक्षाकडून कठोर इशारा देण्यात आला आहे. त्यांनी स्पष्ट केले की, भाजप अशा विधानांना कोणतीही मान्यता देत नाही. कर्नल सोफिया संपूर्ण देशाची कन्या आहे, असेही त्यांनी नमूद केले.
