🏏 लखनौ : चेन्नई सुपर किंग्सने लखनौ सुपर जायंट्सचा ५ गडी राखून पराभव केला. सलग पाच पराभवांनंतर चेन्नईने आयपीएल २०२५ मध्ये पहिला विजय मिळवला.
📊 एकाना स्टेडियमवर खेळल्या गेलेल्या या सामन्यात, लखनौ सुपर जायंट्सने प्रथम फलंदाजी करत १६६ धावा केल्या, प्रत्युत्तरात, शेवटच्या षटकापर्यंत चाललेल्या या सामन्यात चेन्नई संघाने ५ विकेट्सने आपला विजय निश्चित केला. एमएस धोनीने ११ चेंडूंत २६ धावांची तुफानी खेळी करून सीएसकेच्या विजयात मोठे योगदान दिले.
🎯 सोमवारी झालेल्या आयपीएल २०२५ च्या रोमांचक सामन्यात चेन्नई सुपर किंग्जच्या गोलंदाजांनी कमालीची अचूकता आणि शिस्त दाखवत लखनौ सुपर जायंट्सला अवघ्या ७ बाद १६६ धावांवर रोखले. कर्णधार ऋषभ पंतचे झुंजार अर्धशतक (६३) देखील संघाला मोठ्या धावसंख्येपर्यंत नेण्यात अपयशी ठरले.
👨🦰 पंतचा संयमी संघर्ष, पण चमक नाही 👨🦰
ऋषभ पंतसाठी ही हंगामातील पहिली मोठी खेळी होती. ४९ चेंडूंवर ६३ धावांची संयमी खेळी. मार्कराम आणि पुरन हे दोघे पॉवरप्लेमध्ये झटपट बाद झाल्यावर पंतने मिशेल मार्श आणि नंतर आयुष बडोनीसोबत डाव सावरला.
मात्र पंतची खेळी जरी गरजेची होती, तरी ती त्याच्या नावाप्रमाणे तितकी आक्रमक वाटली नाही. नूर अहमदविरुद्ध तर तो पूर्णपणे अडखळलेला दिसला. १५ चेंडूंवर फक्त ६ धावा, त्यात १० डॉट बॉल्स! ही आयपीएल इतिहासातील सर्वात मंद लढतींपैकी एक ठरली. त्याचा ११७.७७ चा स्ट्राईक रेट लखनौच्या डावाला मधल्या षटकांत वेग देऊ शकला नाही.
🔥 गोलंदाजांचा अचूक हल्ला
चेन्नईने सामन्याची सुरुवातच दणक्यात केली. खलील अहमदने पहिल्याच षटकात मार्करामला बाद केले आणि राहुल त्रिपाठीने कव्हरवरून घेतलेला झेल प्रेक्षकांच्या डोळ्यांचे पारणे फेडणारा ठरला. त्यानंतर अंशुल कंबोजने धोनीच्या यशस्वी डीआरएसमुळे निकोलस पुरनला अवघ्या ८ धावांवर माघारी पाठवले.
यानंतर मैदानावर जडेजा, नूर आणि पथिराणा या तिघांनी मधल्या षटकांत जणू धावांना कुलूपच लावले. ११ ते १७व्या षटकांत फक्त ३२ धावा दिल्या. लखनौचा डाव एकदम ठप्प झाला.
👑 धोनीचा ऐतिहासिक विक्रम 👑
चेन्नई सुपर किंग्सचा कर्णधार महेंद्रसिंह धोनी याने पुन्हा एकदा आपल्या यष्टिरक्षणाच्या कौशल्याने सर्वांचे लक्ष वेधले. लखनौ सुपर जायंट्सविरुद्ध झालेल्या सामन्यात त्याने आयुष बडोनीला यष्टिचित करत आयपीएल इतिहासात एक अनोखा विक्रम आपल्या नावावर केला. धोनी आयपीएलमध्ये २०० विकेट घेतलेले पहिला विकेटकीपर ठरला आहे.
आयपीएल २०२५ मधील ३०व्या सामन्यात लखनौने चेन्नईसमोर १६७ धावांचे लक्ष्य ठेवले होते. या सामन्यात धोनीने आपली चपळता दाखवत स्टम्पिंगच्या माध्यमातून बडोनीला बाद केले आणि क्रिकेट चाहत्यांच्या मनात पुन्हा एकदा आपली जागा पक्की केली.
| खेळाडू | सामने | डाव | बळी |
|---|---|---|---|
| महेंद्रसिंह धोनी | २७१ | २६१ | २०१ |
| दिनेश कार्तिक | २५७ | २३५ | १७४ |
| पार्थिव पटेल | १७० | १४९ | ११३ |
| ऋषभ पंत | ११८ | १०८ | ९९ |
🌟 वयाची ४४ वर्षे पार करत आलेला धोनी आजही आपल्या चपळतेने युवा खेळाडूंना लाजवेल असा खेळ करत आहेत. त्यांच्या यष्टिरक्षणाच्या कौशल्याचे आजही क्रिकेटविश्वात भरभरून कौतुक होत आहे. आयपीएलमधील त्याच्या एकूण धावसंख्येबाबत बोलायचे झाल्यास, त्याने आतापर्यंत ३८८३ धावा केल्या आहेत. लखनौविरुद्धच्या सामन्यातील योगदान या आकडेवारीत समाविष्ट नाही.
