देशभरात समान टोल आकारणी होणार, नितीन गडकरींची माहिती

दिल्लीः केंद्रीय रस्ते वाहतूक अन् महामार्ग मंत्री नितीन गडकरी यांनी वाहनचालकांच्यादृष्टीने महत्वाची बातमी दिली आहे. पुढील काही काळात देशभरात  एकसारखा टोल लागू करण्याबाबत काम सुरु असल्याची माहिती गडकरी यांनी एका मुलाखती दरम्यान दिली आहे. 

राष्ट्रीय महामार्गावरील प्रवाशांना आता यामुळे दिलासा मिळणार आहे. गडकरी म्हणाले की, आम्ही एकसमान टोल धोरणावर काम करत आहोत. यामुळे प्रवाशांच्या अडचणी कमी होणार आहे. 

राष्ट्रीय महामार्गांवर ग्लोबल नेव्हिगेशन सॅटेलाइट सिस्टीम आधारित टोल संकलन प्रणाली लागू करण्याचा निर्णय घेतला आहे, त्यामुळे प्रवाशांना याचा खूप फायदा होणार आहे. या निर्णयामुळे देशात लवकरच सगळीकडे एकसमान टोल लागू होऊ शकतो. 

सध्या राष्ट्रीय महामार्गांवर ६० टक्के वाहने ही खाजगी आहेत. तर टोल वसूलीत त्यांना २०-६० टक्के वाटा आहे. त्यामुळे टोल आकारणी वाढली आहे. यामुळे प्रवाशांना जास्त त्रास होत असल्याचे गडकरी म्हणाले.