व्हाट्सऍप हॅक झालाय??!!

काही दिवसांपूर्वीची गोष्ट, माझ्या मैत्रिणीची पोस्ट फेसबुकवर दिसली - ‘माझा व्हाट्सऍप एकाउंट हॅक झाला असून माझ्या नावाने जर कुणी पैसे मागणारा मेसेज केला असेल तर ती मी नव्हे याची कृपया नोंद घ्यावी.’ तसेच स्वत:चा हल्लीच व्यवसाय सुरु केलेल्या मित्रानेही अशी पोस्ट केली. दोघांचेही व्हाट्सऍप एकाउंट हॅक झाले होते आणि दोघांचीही कारणे वेगवेगळी होती. मैत्रिणीने म्हणे तिला तिच्या संपर्कातील जवळच्या एका व्यक्तीने तिच्या मोबाईलवर आलेला ओटीपी विचारला आणि हिने दिला. दुसऱ्याचं कारण होतं ते म्हणजे, त्याला एक सरकारी योजनेसाठी रेजिस्टर व्हा अश्या संदर्भाचा एक मेसेज आलेला आणि त्यातल्या लिंकवर याने क्लिक केलेले. 

अन्न, वस्त्र, निवारा या माणसाच्या मूलभूत गरजांमध्ये हल्ली अजून एक गोष्ट अॅड करावी लागतेय 

ती म्हणजे व्हाट्सऍप. व्हाट्सऍपसारख्या इन्स्टंट मेसेजिंग ऍप्सच्या वाढत्या वापरामुळे वेगवेगळ्या क्लूप्त्यांनी हॅकर्स आपल्या वैयक्तिक डेटामध्ये प्रवेश करत आहेत. आणि असा जेव्हा आपल्या ऑनलाइन अकाऊंटवर अटॅक होतो तेव्हा आपले खाजगी फोटो, संपर्क, बँक डिटेल्स अश्या बर्‍याच आपल्यासाठी महत्त्वाच्या असलेल्या गोष्टी धोक्यात येतात. हल्ली आपली प्रत्येक महत्त्वाची माहिती ऑनलाइन पद्धतीने आपण मोबाइल किंवा इतर प्लॅटफॉर्मवर ठेवत असतो त्यामुळे हा धोका टाळण्यासाठी आपण हॅकर्सवर बारीक लक्ष ठेवणे गरजेचे आहे. काही वेगळी चिन्हे व्हाट्सऍप वापरण्यात दिसू लागली की आपण आपला अकाऊंट हॅक झाल्याचे ओळखू शकतो. जाणून घेऊयात ही कोणती चिन्हे आहेत.

• - नवीन माणसे जोडली जाणे : अशी काही माणसे जी आपल्या कॉनटॅक्ट लिस्टमध्ये नाहीच आहेत, ज्यांना आपण कधीच अॅड केलेले नसेल ती अचानक जर आपल्या व्हाट्सऍपमध्ये दिसू लागली तर समजून जावे की आपला व्हाट्सऍप अकाऊंट हॅक झाला आहे. 

 - अनोळखी व्यक्तींशी चॅट होत असेल : जर आपल्या नकळत कुणीतरी अनोळखी व्यक्ती आपल्या खात्यातून चॅट करत असेल तर समजून जावे की आपला व्हाट्सऍप अकाऊंट हॅक झाला आहे. 

- लॉग इन करण्यात व्यत्यय : जर आपल्या स्वत:च्या व्हाट्सऍप अकाऊंटमध्ये लॉग इन करण्यात काही व्यत्यय येत असेल किंवा कित्येक प्रयत्नांनीसुद्धा लॉग इन होत नसेल तर आपला व्हाट्सऍप हॅकर्सच्या तावडीत सापडला आहे. 

- वारंवार व्हेरिफिकेशन कोड येत असेल : जर व्हाट्सऍपकडून वारंवार व्हेरिफिकेशन कोड येत असेल तर त्याकडे दुर्लक्ष करू नका कारण याचे कारण कुणीतरी आपला अकाऊंट हॅक केला आहे असा होऊ शकतो.

जर तुमचे व्हॉट्सअॅप अकाउंट हॅक झाले असेल तर लगेच व्हॉट्सअॅप हेल्पलाइनवर संपर्क साधा. तुमचे व्हॉट्सअॅप अकाउंट हॅक होण्याची चिन्हे आढळल्यास तुम्हाला अलर्ट केले जाईल. सतर्क राहून तुम्ही तुमचा पर्सनल डेटा सुरक्षित ठेवू शकता.

व्हाट्सऍप हॅकर्सपासून सावधान कसे राहाल?

1. संशयास्पद मेसेजेसपासून सावध राहणे : व्हाट्सऍप व्हेरिफिकेशन कोड विचारणारे मेसेजस आल्यास सतर्क व्हावे. खासकरून जेव्हा एखाद्या ओळखीच्या नंबरवरुन असा मेसेज आल्यास जपून रहा. 
2. संशयास्पद मेसेजेस फॉरवर्ड करू नका : असे संशयास्पद मेसेजेस आल्यास ते इतर कुणाला फॉरवर्ड करू नका.
3. पडताळणी करा : जर तुमच्या ओळखीतल्या संपर्काकडून असा एखादा कोड पाठवण्याबाबत किंवा तुमची माहिती पाठवण्याबाबत मेसेज आला असेल तर सरळ त्या व्यक्तीला फोन करून आधी खात्री करून घ्या की ही माहिती मागणारी तीच व्यक्ती आहे. 
4. टू स्टेप्स व्हेरिफिकेशन एनेबल करा : आपल्या व्हाट्सऍपवर असलेले टू स्टेप व्हेरिफिकेशन आपल्या व्हाट्सऍप अकाऊंटला संरक्षण देत असते. त्यामुळे व्हाट्सॲप सेटिंग्ज > अकाऊंट > टू स्टेप व्हेरिफिकेशनमध्ये जाऊन ते इनेबल करा.
5. संशयास्पद हालचालींना रिपोर्ट करा : जर आपल्याला व्हाट्सॲपवर काही संशयास्पद संदेश, खाती दिसली तर त्वरित कंप्लेंट करा.
6. अनोळखी लिंकवर क्लिक करु नका : व्हॉट्सअ‍ॅप हॅक होण्याचे आणखी एक मोठे कारण आहे. तुम्हाला जर मेसेज किंवा ईमेलच्या माध्यमातून लिंक मिळाली, तुम्ही चुकीने त्या लिंकला क्लिक केले तर तुमचा फोन हॅक होऊ शकतो. कोणाकडे तुमच्या फोनचा अ‍ॅक्सेस गेल्यावर व्हॉट्सअ‍ॅप सहज हॅक होऊ शकतो.