राष्ट्रकुल स्पर्धा : पाकिस्तानचे दोन बॉक्सर बेपत्ता

|
11th August 2022, 09:38 Hrs
राष्ट्रकुल स्पर्धा : पाकिस्तानचे दोन बॉक्सर बेपत्ता

बर्मिंगहॅम : पाकिस्तान बॉक्सिंग फेडरेशन सध्या अडचणीत आहे. राष्ट्रकुल क्रीडा स्पर्धेमध्ये सहभागी होण्यासाठी बर्मिंगहॅम येथे गेलेले त्यांचे दोन बॉक्सर बेपत्ता झाले आहेत. राष्ट्रकुल क्रीडा स्पर्धा संपल्यानंतर दोन्ही खेळाडू बेपत्ता झाल्याचे महासंघाने सांगितले. पाकिस्तान बॉक्सिंग फेडरेशनचे (पीबीएफ) सचिव नासेर तांग यांनी सांगितले की, सुलेमान बलोच आणि नझिरुल्ला हे दोन खेळाडू इस्लामाबादला जाण्यापूर्वी बेपत्ता झाले.

२८ जुलै ते ८ ऑगस्ट या कालावधीत बर्मिंगहॅम येथे कॉमनवेल्थ गेम्सचे आयोजन करण्यात आले होते. या घटनेचे वर्णन करताना तांग म्हणाले, सुलेमान आणि नझिरुल्ला यांच्या पासपोर्टसह सर्व प्रवासी कागदपत्रे अजूनही फेडरेशनच्या अधिकाऱ्यांकडे आहेत. हे अधिकारी टीमसोबत बर्मिंगहॅमला गेले.

नासेर तांग पुढे म्हणाले की, संघ व्यवस्थापनाने ब्रिटनमधील पाकिस्तान उच्चायुक्तांना आणि लंडनमधील संबंधित अधिकाऱ्यांना याची माहिती दिली आहे. ते पुढे म्हणाले की, दोन्ही खेळाडूंची कागदपत्रे सर्व खेळाडूंसाठी प्रमाणित कार्यपद्धतीनुसार ठेवण्यात आली होती. पाकिस्तान ऑलिम्पिक असोसिएशनने (पीओए) या घटनेबाबत सक्रियता दाखवली आहे. चौकशीसाठी चार सदस्यीय समिती स्थापन केली आहे.

श्रीलंकेचे खेळाडूही गायब

याआधी बर्मिंगहॅममधूनही अनेक श्रीलंकेचे खेळाडू बेपत्ता झाले आहेत. श्रीलंकेच्या खेळाडूंबाबत अशी भीती व्यक्त केली जात आहे की, देशात सध्या सुरू असलेल्या आर्थिक संकटामुळे ते इंग्लंडमध्येच थांबले आहेत. श्रीलंकेचे एकूण ७ खेळाडू बेपत्ता असल्याची माहिती आहे. खेळाडूंना ६ महिन्यांचा व्हिसा आहे आणि बेपत्ता झालेल्या खेळाडूंना कदाचित इंग्लंडमध्ये स्वतःसाठी काही काम शोधायचे आहे.

पाकिस्तानच्या दोन बेपत्ता बॉक्सर्सबद्दल अद्याप माहिती मिळालेली नाही, त्यांच्या बेपत्ता होण्यामागचे कारण काय आहे. मात्र, नोकरीमुळे थांबल्याचे मानले जात आहे. सध्या बर्मिंगहॅम पोलीस या दोन्ही बॉक्सरचा शोध घेत आहेत. दोन्ही बॉक्सरचे पासपोर्ट आणि इतर कागदपत्रे पाकिस्तानी अधिकाऱ्यांकडे आहेत.

राष्ट्रकुल स्पर्धेत बॉक्सिंगमध्ये पाकिस्तानला एकही पदक मिळाले नाही. पाकिस्तानने वेटलिफ्टिंग आणि भालाफेकीत दोन सुवर्णपदके जिंकली. पाकिस्तानला एकूण आठ पदके मिळाली.