पणजी : पर्वरीच्या नव्या सहापदरि उड्डाणपुलाचे शुक्रवारी सायंकाळी उद्घाटन झाल्यानंतर लागलीच शनिवारी सायंकाळी घडलेल्या एका भीषण रस्ता अपघाताच्या पार्श्वभूमीवर राज्य सरकार आणि वाहतूक प्रशासन पूर्णपणे ॲक्शन मोडमध्ये आले आहे. या प्राणघातक दुर्घटनेची गंभीर दखल घेत सार्वजनिक बांधकाम मंत्री दिगंबर कामत यांनी रविवारी सकाळी तातडीने घटनास्थळाची प्रत्यक्ष पाहणी केली. त्यानंतर त्यांनी पोलीस अधीक्षक, ट्रॅफिक सेल, वाहतूक विभागाचे वरिष्ठ अधिकारी आणि विविध विभागांच्या अभियंत्यांची उच्चस्तरीय बैठक बोलावून वाहतूक सुरक्षा उपायांचा सविस्तर आढावा घेतला.
मंत्री दिगंबर कामत यांची पाहणी आणि महत्त्वाचे निर्देश
अपघाताच्या पार्श्वभूमीवर मंत्री दिगंबर कामत यांनी पीडब्ल्यूडी आणि महामार्ग प्राधिकरणाच्या अधिकाऱ्यांसोबत घटनास्थळाची बारकाईने पाहणी केली. या वेळी अभियंत्यांशी विविध तांत्रिक मुद्द्यांवर चर्चा करून त्यांनी या समस्येच्या सर्व फायद्या-तोट्यांचा (pros and cons) आढावा घेतला.
अपघाताचे मुख्य कारण स्पष्ट करताना मोबाईलवरील सीसीटीव्ही फुटेज दाखवत कामत म्हणाले की, एका वाहनाचा अतिवेग आणि बेदरकार ड्रायव्हिंग (reckless/racing drive) हेच या दुर्घटनेचे मूळ कारण होते. त्या भरधाव कारने इतर वाहनांना धोकादायकरीत्या ओव्हरटेक करत थेट ट्रकला अन् त्यानंतर एका स्कूटरला धडक दिली.
अपघातांवर तात्काळ नियंत्रण मिळवण्यासाठी मंत्री कामत यांनी उड्डाणपुलावर तातडीने स्पीड डिटेक्शन रडार आणि कॅमेरे बसवण्याच्या सूचना दिल्या आहेत. त्यांनी स्पष्ट केले की, या मार्गावर ताशी ६५ किमी ही वेगमर्यादा अधिसूचित (notified) करण्यात आलेली असतानाही, अनेक चालक ८० ते ९० किमी किंवा त्याहून अधिक वेगाने वाहने हाकत आहेत. आता वेग मर्यादेचे उल्लंघन करणाऱ्या प्रत्येक वाहनावर स्वयंचलित ई-चलान जारी केले जाईल.
तसेच, 'रेंट-अ-कार/बाइक' घेणारे पर्यटक अटल सेतूच्या मार्गाबाबत वारंवार गोंधळात पडतात. अटल सेतूवर दुचाकींना प्रवेश नाही. तरीही योग्य मार्गदर्शक फलक नसल्याने अनेक दुचाकीस्वार चुकून याच मार्गाने जातात; म्हणूनच स्पष्ट दिशादर्शक बोर्ड त्वरित लावण्याचे निर्देश त्यांनी दिले. "प्रत्येक मानवी जीवन हे अत्यंत मोलाचे आहे; जबाबदारीने वाहन चालवल्यास जीव वाचू शकतात," असे आवाहन त्यांनी सर्व प्रवाशांना केले.
आयआयएम नागपूर करणार मेरशी येथील वाहतूक कोंडीचा अभ्यास
आयआयएम नागपूर येथील तज्ज्ञांचे पथक मेरशी सर्कल येथील वाहतूक कोंडीची समस्या सोडवण्यासाठी आणि अपघात रोखण्यासाठी तेथील वाहतूक व्यवस्थेचा सविस्तर अभ्यास करून उपाययोजना सुचवणार आहे. हे पथक या परिसरातील वाहतूक व्यवस्थापनासाठी एक मास्टर प्लॅन देखील तयार करेल, अशीही माहिती दिगंबर कामत यांनी दिली.
.
आमदार मायकल लोबो यांची लेन शिस्त अन् कडक नियमांची मागणी
दुसरीकडे, या जीवघेण्या अपघातानंतर आमदार मायकल लोबो यांनी रस्त्यांवरील सुरक्षिततेबाबत तीव्र चिंता व्यक्त केली आहे. महामार्गावर प्रवास करताना वाहनधारकांनी अधिक खबरदारी बाळगणे आणि रस्ते वाहतुकीचे नियम काटेकोरपणे पाळणे अत्यंत गरजेचे असल्याचे मत त्यांनी मांडले.
लोबो म्हणाले की, जेव्हा एखादे वाहन एका पुलावरून उतरून दुसऱ्या पुलावर चढते किंवा मुख्य महामार्गाला जोडणाऱ्या रस्त्यांवरून प्रवास करते, तेव्हा वाहनाचा वेग नियंत्रित असणे आवश्यक आहे. यासाठी राज्य सरकार व राष्ट्रीय महामार्ग प्राधिकरणाने (NHAI) महामार्ग आणि उड्डाणपुलांवर तात्काळ वेगमर्यादेचे (Speed Limit) फलक, तसेच 'नो-ओव्हरटेकिंग'चे (No Overtaking) स्पष्ट संकेतचिन्ह आणि सूचना बोर्ड लावावेत.
लेन शिस्तीवर भर देताना मायकल लोबो यांनी सर्व स्थानिक तसेच पर्यटकांना आपापल्या लेनमध्येच वाहन चालवण्याचा सल्ला दिला. दुचाकीस्वारांसाठी विशेष मार्गदर्शक सूचना देताना त्यांनी स्पष्ट केले की, दुचाकीस्वारांनी नेहमी डाव्या बाजूला असलेल्या लेनमधूनच प्रवास करावा आणि उजव्या बाजूने धोकादायक ओव्हरटेकिंग करू नये. चालकांनी चारचाकीत सीटबेल्ट आणि दुचाकीवर हेल्मेटचा वापर अनिवार्य करावा, तसेच आपल्या कुटुंबाच्या सुरक्षेसाठी वेगावर नियंत्रण ठेवावे.
याशिवाय, वाढते अपघात टाळण्यासाठी 'अटल सेतू'वर दुचाकी वाहनांना पूर्णपणे प्रवेशबंदी करण्यात यावी, अशी मागणी लोबो यांनी केली. या संदर्भात राज्य सरकारने राष्ट्रीय महामार्ग प्राधिकरणाशी (NHAI) अधिकृत पत्रव्यवहार करून योग्य ती पावले उचलावीत, असा सल्ला त्यांनी दिला.
पर्वरी उड्डाणपुलावरील वाहतुकीत मोठे बदल आणि नवे नियम
अपघाताची गंभीर दखल घेत प्रशासनाने पर्वरी उड्डाणपुलावरील वाहतुकीत तातडीने खालील धोरणात्मक बदल लागू केले आहेत:
१) दुचाकी वाहनांना पूर्ण बंदी: पर्वरी उड्डाणपुलावर आता दुचाकी वाहनांना (Two-Wheelers) अजिबात प्रवेश दिला जाणार नाही.
२) सर्व्हिस रोड बंद: गिरी आणि निओ मॅजेस्टिक जवळील सर्व्हिस रोडचे प्रवेश मार्ग पूर्णपणे बंद करण्यात आले आहेत.
३) म्हापसाकडे जाणारी वाहतूक वळवली: म्हापसाच्या दिशेने जाणाऱ्या वाहतुकीचे मार्ग बदलण्यात आले असून, आता ही वाहतूक मेरशी (Merces) मार्गे 'अटल सेतू'वर वळवण्यात आली आहे.
४) म्हापसा-पणजी प्रवास: म्हापसा ते पणजी दरम्यान प्रवास करणाऱ्या वाहतुकीसाठी जुन्याच पारंपरिक मार्गाचा वापर केला जाईल.