शामली :उत्तर प्रदेशातील शामली जिल्ह्यात एका तरुणाचे बळजबरीने धर्मपरिवर्तन करण्यात आल्याचा आरोप समोर आला आहे. एका औषध व्यापाऱ्याच्या मुलाला प्रेमसंबंधांच्या माध्यमातून जाळ्यात ओढून त्याचे धर्मांतर करण्यात आले आणि त्यानंतर त्याला दिल्लीत नेऊन निकाह लावण्यात आल्याचा दावा कुटुंबीयांनी केला आहे. या प्रकरणी पोलिसांनी कारवाई करत मुख्य आरोपी जिम ट्रेनर तरुणी आणि तिच्या वडिलांना अटक केली आहे.
औषध व्यावसायिकाच्या मुलाबाबत कुटुंबीयांची तक्रार
शामलीच्या दयानंदनगर भागात राहणारे देवराज सिंह मलिक हे केमिस्ट असोसिएशनचे अध्यक्ष असून ते औषध व्यवसायाशी संबंधित आहेत. त्यांचा २७ वर्षीय मुलगा आयुष मलिक याने बी. फार्माचे शिक्षण पूर्ण केले असून तो वडिलांच्या मेडिकल स्टोअरच्या कामकाजात मदत करत होता.
वर्तनात अचानक बदल झाल्याचा दावा
देवराज सिंह मलिक यांनी पोलिसांकडे दिलेल्या तक्रारीत म्हटले आहे की, गेल्या काही काळात आयुषच्या वर्तनात अचानक बदल दिसून आला. त्याने दाढी वाढवली, डोक्यावर टोपी घालण्यास सुरुवात केली तसेच दिवसातून अनेक वेळा नमाज पठण करू लागला. त्याने आपले नाव बदलून ‘रहमान’ ठेवल्याचाही आरोप तक्रारीत करण्यात आला आहे.
तक्रारदारांच्या म्हणण्यानुसार, आरोपी तरुणीच्या भावाने आयुषच्या मोबाईलमध्ये पाकिस्तानातील एका धार्मिक नेत्याचे यूट्यूब चॅनेल आणि संबंधित पेज सबस्क्राईब करून दिले होते. आयुष बराच वेळ या चॅनेलवरील व्हिडिओ पाहत असे आणि त्यातूनच त्याच्या विचारांमध्ये बदल घडवून आणण्यात आला, असा आरोप कुटुंबीयांनी केला आहे.
पोलिसांकडून तपास सुरू
या प्रकरणात नोंदवलेल्या तक्रारीच्या आधारे पोलिसांनी तपास सुरू केला असून, जिम ट्रेनर तरुणी आणि तिच्या वडिलांना अटक करण्यात आली आहे. धर्मांतर आणि विवाहासंदर्भातील सर्व बाबींची चौकशी सुरू असल्याची माहिती पोलिस सूत्रांनी दिली आहे.