कर्नाटकात चार उपमुख्यमंत्र्यांच्या सूत्रावर काँग्रेसमध्ये खलबते

बेंगळुरू : कर्नाटकात मुख्यमंत्री सिद्धरामय्या यांच्या राजीनाम्यानंतर राज्याच्या राजकारणात मोठी घडामोड सुरू झाली आहे. काँग्रेसमध्ये नव्या नेतृत्वाबाबत हालचाली वेगाने सुरू आहेत. पक्षातील सूत्रांच्या माहितीनुसार, डीके शिवकुमार यांच्या नेतृत्वाखाली स्थापन होणाऱ्या नव्या सरकारमध्ये सामाजिक आणि प्रादेशीक समतोल राखण्यासाठी चार उपमुख्यमंत्री नेमण्याच्या सूत्रावर गंभीर चर्चा सुरू आहे.

उपमुख्यमंत्री डीके शिवकुमार आज दिल्लीमध्ये काँग्रेस नेते राहुल गांधी आणि पक्षाध्यक्ष मल्लिकार्जुन खर्गे यांची भेट घेऊन मंत्रिमंडळ फेरबदलाबाबत चर्चा करणार असल्याची माहिती सूत्रांनी दिली.  या बैठकीत चार उपमुख्यमंत्र्यांच्या प्रस्तावावरही मंथन होण्याची शक्यता आहे.

माजी मुख्यमंत्री सिद्धरामय्या, डीके शिवकुमार आणि अखिल भारतीय काँग्रेस कमिटीचे कर्नाटक प्रभारी रणदीप सुरजेवाला हेही पक्षश्रेष्ठींसोबत चर्चा करणार आहेत. राज्यसभा निवडणुका, विधान परिषद निवडणुका आणि मंत्रिमंडळ फेररचना या मुद्द्यांवर बैठकीत विशेष भर राहणार असल्याचे सांगितले जात आहे.

अनेक मंत्र्यांना नव्या मंत्रिमंडळात स्थान मिळण्याची शक्यता कमी 

सूत्रांच्या माहितीनुसार, सिद्धरामय्या यांच्या मंत्रिमंडळातील अनेक मंत्र्यांना नव्या मंत्रिमंडळात स्थान मिळण्याची शक्यता कमी आहे. त्यामुळे विविध समाजघटक आणि प्रदेशांना प्रतिनिधित्व देण्यासाठी चार उपमुख्यमंत्री नियुक्त करण्याचा पर्याय पुढे आला आहे.

सिद्धरामय्याचे पुत्र यतींद्रचा नव्या मंत्रिमंडळात होणार समावेश 

दरम्यान, सिद्धरामय्या यांचे पुत्र आणि विधान परिषदेचे सदस्य यतींद्र यांना नव्या मंत्रिमंडळात महत्त्वाची जबाबदारी मिळण्याची शक्यता व्यक्त केली जात आहे. त्यांना प्रभावी खाते देऊन सिद्धरामय्या यांचा राजकीय वारसा कायम ठेवण्याचा संदेश पक्षाकडून दिला जाऊ शकतो.

काँग्रेस विधिमंडळ पक्षाच्या बैठकीची तारीख आज निश्चित होण्याची शक्यता असून, त्यानंतर डीके शिवकुमार यांच्या मुख्यमंत्रीपदाच्या शपथविधीचा मुहूर्त जाहीर होऊ शकतो.

कर्नाटकात राज्यसभेच्या चार जागांसाठी होणार निवडणुका

कर्नाटकातील राज्यसभेच्या चार जागांसाठी लवकरच निवडणुका होणार आहेत.  त्यापैकी दोन जागांवर काँग्रेसचा विजय जवळपास निश्चित मानला जात आहे, तर तिसऱ्या जागेसाठीही पक्ष मजबूत स्थितीत असल्याचे सूत्रांनी सांगितले. रणदीप सुरजेवाला हे राज्यसभेसाठी संभाव्य उमेदवारांची यादी पक्षश्रेष्ठींकडे सादर करणार असून, मल्लिकार्जुन खर्गे यांना पुन्हा राज्यसभेत संधी मिळण्याची शक्यता आहे.

उमेदवारांची यादी पक्षश्रेष्ठींना सादर करणार 

याशिवाय, विधान परिषदेच्या  (MLC) सात जागांसाठी होणाऱ्या निवडणुकांसाठी संभाव्य उमेदवारांची यादीही पक्षश्रेष्ठींना सादर केली जाणार आहे.

सिद्धरामय्या यांचा राजीनामा स्वीकारला

दरम्यान, राज्यपाल थावरचंद गेहलोत यांनी मुख्यमंत्री सिद्धरामय्या यांचा राजीनामा अधिकृतपणे स्वीकारला आहे. भारतीय राज्यघटनेच्या कलम १६४(१) अंतर्गत त्यांचा राजीनामा मंजूर करण्यात आला असून, त्यांच्या नेतृत्वाखालील मंत्रिमंडळ तत्काळ प्रभावाने बरखास्त करण्यात आल्याचे राज्यपालांनी जाहीर केले.