डान्सचा व्हिडिओ व्हायरल, पुणेकरांमध्ये तीव्र संताप
पुणे: संपूर्ण महाराष्ट्र हादरवून सोडणाऱ्या पुण्यातील बहुचर्चित पोर्श कार अपघात प्रकरणातील मुख्य आरोपी आणि बडा बांधकाम व्यावसायिक विशाल अग्रवाल हा पुन्हा एकदा अत्यंत वादग्रस्त कारणाने चर्चेत आला आहे. अपघातात दोन निष्पाप तरुण आयटी इंजिनिअर्सचा बळी गेलेला असताना आणि स्वतः पुराव्यांची हेराफेरी केल्याच्या गंभीर आरोपाखाली तुरुंगात राहून आल्यानंतरही, अग्रवाल कुटुंबाचा मस्तवालपणा अद्याप कायम असल्याचे समोर आले आहे. महिनाभरापूर्वी न्यायालयाकडून जामीन मिळवून तुरुंगातून बाहेर आलेल्या विशाल अग्रवालचा आपल्या कुटुंबीयांसह जंगी पार्टी करतानाचा एक व्हिडिओ सोशल मीडियावर जोरदार व्हायरल झाला आहे. या व्हिडिओतील संतापजनक दृश्यांमुळे नागरिकांमधून आणि विशेषतः पुणेकरांमधून अत्यंत तीव्र प्रतिक्रिया उमटत आहेत.
व्हायरल झालेल्या या व्हिडिओमध्ये विशाल अग्रवाल आणि त्याची पत्नी एका अलिशान पार्टीमध्ये बेभान होऊन नाचताना दिसत आहेत. सर्वात धक्कादायक बाब म्हणजे या दोघांच्याही गळ्यात कोऱ्याकरकरीत नोटांचे मोठे हार घातलेले स्पष्टपणे पाहायला मिळत आहेत. मुंबई से आया मेरा दोस्त, दोस्तो सलाम करो या प्रसिद्ध हिंदी गाण्यावर हे कुटुंब अत्यंत आनंदात सेलिब्रेशन करत असून, विशाल अग्रवाल याच्या एका नातेवाईकाने त्याला थेट खांद्यावर उचलून घेतल्याचेही व्हिडिओमध्ये दिसते आहे. जामिनावर सुटका झाल्यानंतर अशा प्रकारे जाहीर आणि उद्धटपणे आनंदोत्सव साजरा करणे, हे कायदेव्यवस्थेला आणि सामाजिक संवेदनशीलतेला आव्हान देणारे असल्याचा सूर उमटत आहे.
गेल्यावर्षी कल्याणीनगर भागात अग्रवाल यांच्या अल्पवयीन मुलाने दारूच्या नशेत भरधाव वेगाने पोर्श कार चालवून दोघांना चिरडले होते. यानंतर त्याला वाचवण्यासाठी अग्रवाल कुटुंबाने सर्व स्तरावर शासकीय यंत्रणेचा गैरवापर करण्याचा प्रयत्न केला होता. सुरुवातीला पोलीस ठाण्यातच संशयित मुलाला पिझ्झा-बर्गर पुरवून विशेष वागणूक देण्यात आली. त्यानंतर मुलाच्या रक्तातील मद्याचा अंश लपवण्यासाठी ससून रुग्णालयातील डॉक्टर आणि कर्मचाऱ्यांना लाच देऊन रक्ताचे नमुने बदलण्यात आले. इतकेच नव्हे तर, गुन्हा स्वतःच्या अंगावर घेण्यासाठी त्यांच्या घरच्या गरीब ड्रायव्हरला डांबून ठेवून त्याला जीवे मारण्याची धमकीही विशाल अग्रवाल आणि आजोबा सुरेंद्र अग्रवाल यांनी दिली होती.
या सर्व धक्कादायक पुराव्यांचा पर्दाफाश झाल्यानंतर पोलिसांनी विशाल अग्रवालला अटक केली होती. या खटल्यातील आरोपी असलेला मुलगा अल्पवयीन असल्याने त्याची बालसुधारगृहातून आधीच सुटका झाली होती, तर महिनाभरापूर्वी विशाल अग्रवाललाही न्यायालयाने जामीन मंजूर केला. मात्र, तुरुंगातून बाहेर येताच या कुटुंबाने ज्या अमानवी आणि मस्तवाल पद्धतीने हा आनंद साजरा केला आहे, त्याने जुन्या जखमा पुन्हा ताज्या केल्या आहेत. पैशाच्या बळावर कायद्याला वाकवण्याचा प्रयत्न करणाऱ्या आणि मानवी मूल्यांची पायमल्ली करणाऱ्या अशा धनदांडग्यांच्या वृत्तीवर आता सोशल मीडियाच्या माध्यमातून सर्वसामान्य जनतेकडून चहूबाजूंनी कडक शब्दांत टीका केली जात आहे.
