चेन्नई : जवळपास सहा दशकांपासून तामिळनाडूच्या राजकारणावर द्रविड पक्षांची एकहाती सत्ता होती. परंतु, या प्रदीर्घ परंपरेला छेद देत अभिनेता-दिग्दर्शक विजय यांच्या 'तमिळगा वेत्री कळघम' (टीव्हीके) या अवघ्या दोन वर्षे जुन्या पक्षाने नुकत्याच पार पडलेल्या विधानसभा निवडणुकीत ऐतिहासिक आणि अनपेक्षित यश मिळवले आहे. २३४ सदस्यीय विधानसभेत टीव्हीकेने तब्बल १०८ जागा जिंकून सर्वात मोठा पक्ष म्हणून आपले अस्तित्व सिद्ध केले. या निकालांमुळे द्रमुक आणि अण्णाद्रमुक या पारंपारिक पक्षांना मोठा धक्का बसला आहे. असे असले तरी, सरकार स्थापनेच्या जादुई आकड्यापासून पक्ष १० जागांनी दूर राहिल्याने, विजय यांच्यासमोरील राजकीय आव्हाने वाढली होती.
या राजकीय पेचप्रसंगातून मार्ग काढण्यासाठी काँग्रेस पक्षाने पुढाकार घेतला असून, त्यांनी टीव्हीकेला सशर्त पाठिंबा देण्याचा निर्णय जाहीर केला आहे. तमिळनाडू प्रदेश काँग्रेसच्या राजकीय कामकाज समितीची (पीएसी) मंगळवारी रात्री उशिरा एक तातडीची बैठक पार पडली. या ऑनलाइन किंवा व्हर्च्युअल बैठकीत टीव्हीकेचे प्रमुख विजय यांना समर्थन देण्याचा ठराव एकमताने मंजूर करण्यात आला. सूत्रांच्या माहितीनुसार, या बैठकीनंतर काँग्रेसचे अधिकृत पाठिंबा पत्र बुधवारी जारी केले जाईल. त्यानंतर काँग्रेसचे नवनिर्वाचित आमदार पनैयूर येथील टीव्हीकेच्या मुख्यालयात जाऊन विजय यांची प्रत्यक्ष भेट घेतील.
संख्याबळाचा विचार केल्यास, तामिळनाडू विधानसभेतील बहुमताचा आकडा ११८ आहे. टीव्हीकेने १०८ जागा जिंकल्या आहेत, मात्र टीव्हीकेचे प्रमुख विजय यांनी दोन मतदारसंघातून विजय मिळवला आहे. नियमांनुसार त्यांना एक जागा सोडावी लागणार आहे. त्यामुळे टीव्हीकेची सदस्यसंख्या १०७ वर येईल, तरीही बहुमताचा आकडा ११८च राहणार आहे. अशा स्थितीत सरकार स्थापन करण्यासाठी टीव्हीकेला ११ आमदारांची अतिरिक्त गरज आहे. काँग्रेसकडे ५ आमदार आहेत, तर पीएमकेकडे ४ आणि डाव्या पक्षांकडे प्रत्येकी २ आमदार आहेत. काँग्रेसचा पाठिंबा मिळाल्यामुळे टीव्हीकेला आवश्यक बहुमताचा आकडा गाठणे शक्य होईल. काँग्रेसने या बदल्यात दोन कॅबिनेट पदे आणि काही महत्त्वाच्या मंडळांची अध्यक्षपदे मागितल्याचे समजते.
ही युती निश्चित करण्यासाठी विजय यांनी आधीच आपल्या नवनिर्वाचित आमदारांची बैठक चेन्नई येथील त्यांच्या पट्टिनमपक्कम निवासस्थानी घेतली आहे. सर्व आमदारांना महाबलीपुरममधील चेंगलपट्टू स्थित 'फोर पॉइंट्स' नावाच्या रिसॉर्टमध्ये सुरक्षित स्थळी हलवण्यात आले आहे. दुसरीकडे, ७ मे रोजी विजय मुख्यमंत्रिपदाची शपथ घेऊ शकतात आणि त्यांच्यासोबत इतर नऊ मंत्रीही शपथ घेण्याची शक्यता आहे. या नाट्यमय घडामोडींमुळे राजकारणात निर्माण झालेला तणाव पाहता पोलीस आणि प्रशासकीय यंत्रणा सतर्क झाली आहे.
काँग्रेसशिवाय इतर लहान प्रादेशिक पक्षांना एकत्र आणण्याचे प्रयत्न टीव्हीकेकडून सुरू आहेत. यामध्ये व्हीसीके, सीपीआय(एम), सीपीआय आणि आययूएमएल यांसारख्या पक्षांचा समावेश आहे. जर या सर्व लहान पक्षांनी आणि काँग्रेसने एकत्र येऊन टीव्हीकेला साथ दिली, तर विजय यांचा पक्ष सहजपणे बहुमताचा आकडा ओलांडेल. मात्र, द्रमुक (डीएमके) पक्षाने असा विश्वास व्यक्त केला आहे की, डावे आणि व्हीसीके पक्ष टीव्हीकेच्या आघाडीत सामील होणार नाहीत. या सर्व राजकीय घडामोडींच्या पार्श्वभूमीवर आगामी काळात विजय कशा प्रकारे सर्व पक्षांना सोबत घेऊन एक स्थिर आणि पारदर्शक सरकार देतील, हे पाहणे रंजक ठरेल.
