वडिलांना अपमानास्पद वागणूक मिळाल्यानंतर तरुण न्यायाधीशाने बाथरूममध्ये जाऊन गळफास घेत आत्महत्या केली होती.
नवी दिल्ली : दिल्लीच्या न्यायालयात कार्यरत असलेले ३० वर्षीय तरुण न्यायाधीश अमन कुमार शर्मा यांनी कौटुंबिक कलह आणि सासरच्या छळाला कंटाळून स्वतःचे जीवन संपवले. याप्रकरणी त्यांच्या वडिलांनी दिलेल्या तक्रारीवरून दिल्ली पोलिसांनी गुन्हा दाखल केला आहे. अमन कुमार मूळचे खैरथल-तिजारा (राजस्थान) येथील रहिवासी होते आणि ते आपल्या कर्तृत्वामुळे पहिल्याच प्रयत्नात न्यायाधीश झाले होते.
घटनाक्रमावर नजर टाकल्यास असे दिसून येते की, १ मेच्या रात्री अमन कुमार यांनी आपल्या वडिलांना फोन करून सांगितले होते की, ते जीवनाला कंटाळले आहेत. त्यांनी वडिलांना तातडीने दिल्लीला बोलावले होते. मुलाच्या आवाहनानंतर त्यांचे वडील, जे स्वतः एक एडवोकेट आहेत, ते मध्यरात्री १ वाजता दिल्लीत पोहोचले. दुसऱ्या दिवशी सकाळी २ मे रोजी अमन यांच्या उपस्थितीत कौटुंबिक चर्चा सुरू असताना त्यांची पत्नी आणि सासरच्या लोकांनी वारंवार अपमान केल्याचे समोर आले आहे. पत्नीने वडिलांना घर सोडून जाण्यास सांगितले, अन्यथा पोलिसांना बोलावण्याची धमकी दिली. स्वतःच्या वडिलांचा झालेला हा अपमान अमन यांना सहन झाला नाही.
त्यानंतरच्या काही मिनिटांतच अमन कुमार बाथरूममध्ये निघून गेले आणि त्यांनी आतून कडी लावून घेतली. आतमध्ये ते गळफास घेत असताना, त्यांच्या पत्नीने त्यांना थांबवण्याचा प्रयत्न केला नाही. उलट, तिने तिची बहीण, जी जम्मू काश्मीर कॅडरमध्ये आयएएस अधिकारी आहे, तिला फोन करून घरी बोलावले. त्यानंतर दोघी बहिणी अमन यांच्या दोन मुलांना घेऊन तेथून कारने निघून गेल्या. दरम्यान, अमन यांचे वडील गॅलरीत होते. काही वेळाने त्यांनी मुलाला आवाज दिला, मात्र कोणताही प्रतिसाद न मिळाल्यामुळे त्यांनी दरवाजा ठोठावला. अमन यांचा फोन बाथरूममध्ये वाजत असल्याचे समजल्यानंतर त्यांनी नोकराच्या मदतीने काच तोडून पाहिले असता, अमन फासाला लटकलेल्या अवस्थेत आढळले.
या घटनेनंतर अमन कुमार यांचे कुटुंबीय पूर्णपणे धक्क्यात आहेत. अमन कुमार यांच्या निधनानंतर अंत्यसंस्काराच्या वेळीही त्यांची पत्नी तिथे उपस्थित राहिली नाही, तसेच ती आपल्या दोन्ही मुलांना सोबत घेऊन गेली. अमन यांच्यावर राजस्थानमधील अलवर येथे अंत्यसंस्कार करण्यात आले. या संपूर्ण प्रकरणात अमन यांच्या कुटुंबीयांनी त्यांच्या पत्नीसोबतच मेहुणीवरही गंभीर आरोप केले आहेत. मेहुणी आयएएस अधिकारी असून, तिचा पती आयपीएस अधिकारी आहे. या दोघांच्या प्रभावामुळेच घरात कलह निर्माण झाल्याचा आरोप वडिलांनी केला आहे.
दिल्ली पोलिसांनी याप्रकरणी वडिलांच्या जबाबावरून पत्नीविरोधात आत्महत्येस प्रवृत्त करणे आणि छळ केल्याचा गुन्हा दाखल केला आहे. पोलिसांकडून आरोपी पत्नीचा मोबाईल जप्त करण्यात आला असून, त्याची सखोल तपासणी सुरू आहे.
