९९३ रुपये एवढी वाढ
नवी दिल्ली : देशभरात व्यावसायिक वापरासाठीच्या एलपीजी सिलिंडरच्या (commercial LPG cylinders) दरात मोठी वाढ करण्यात आली असून, घरगुती ग्राहकांना मात्र दिलासा देण्यात आला आहे. सरकारी तेल कंपन्यांनी शुक्रवारी जाहीर केलेल्या दरांनुसार १९ किलो व्यावसायिक एलपीजी सिलिंडरच्या किंमतीत तब्बल ९९३ रुपये एवढी वाढ झाली आहे.
दिल्लीमध्ये आता १९ किलोचा व्यावसायिक सिलिंडर ₹३,०७१.५० ला मिळणार असून, मुंबईत त्याची किंमत ₹३,०२४ इतकी झाली आहे. याशिवाय, ५ किलोच्या मिनी (छोटा) सिलिंडरच्या दरात ₹२६१ ची वाढ झाली असून, दिल्लीमध्ये त्याची किंमत सुमारे ₹३३९ पर्यंत पोहोचली आहे.
मात्र, घरगुती वापरासाठीचा १४.२ किलो एलपीजी सिलिंडर (domestic LPG), पेट्रोल, डिझेल आणि रेशनमधील केरोसीन यांच्या दरात कोणताही बदल करण्यात आलेला नाही. साधारण ३३ कोटी घरगुती ग्राहकांना याचा फायदा होणार आहे.
ही दरवाढ मुख्यतः हॉटेल, रेस्टॉरंट, बेकरी आणि इतर व्यावसायिक आस्थापनांवर परिणाम करणारी ठरणार आहे. वाढलेला खर्च काही प्रमाणात ग्राहकांवर टाकला जाऊ शकतो, त्यामुळे येत्या काळात जेवण आणि खाद्यपदार्थांच्या किमती वाढण्याची शक्यता आहे.
आंतरराष्ट्रीय एटीएफमध्ये वाढ
दरम्यान, देशांतर्गत विमान कंपन्यांसाठी एटीएफ (एव्हिएशन टर्बाइन फ्युएल) दर स्थिर ठेवण्यात आले असून, आंतरराष्ट्रीय उड्डाणांसाठी मात्र दर वाढविण्यात आले आहेत.
तेल कंपन्यांच्या माहितीनुसार, एकूण पेट्रोलियम उत्पादनांपैकी सुमारे ८० टक्के उत्पादनांच्या किमतीत कोणताही बदल झालेला नाही, तर ४ टक्के उत्पादनांचे दर कमी झाले आहेत आणि उर्वरित १६ टक्के (मुख्यतः औद्योगिक वापरासाठीचे इंधन) दर वाढले आहेत.
जागतिक बाजारातील चढ-उतार लक्षात घेऊन आणि सामान्य ग्राहकांवर ताण येऊ नये यासाठी संतुलित धोरण अवलंबण्यात आल्याचे तेल कंपन्यांनी स्पष्ट केले आहे.
