हॉटेलमधील मेन्यू घटले : काणकोणात हॉटेल व्यावसायिकांनी निवडला चुलीचा पर्याय
पैंगीण : काणकोणमध्ये व्यावसायिक एलपीजीचा तीव्र तुटवडा निर्माण झाल्यामुळे अनेक हॉटेल्स आणि रेस्टॉरंट्सना मार्चपासून ५० टक्के क्षमतेने काम करावे लागत आहे किंवा तात्पुरते बंद ठेवण्याची वेळ आली आहे. जागतिक शिपिंगमधील व्यत्ययांमुळे गॅसचा पुरवठा मोठ्या प्रमाणात घटला असून, दैनंदिन डिलिव्हरीवर अवलंबून असलेल्या व्यवसायांना मेन्यू मर्यादित करावा लागत आहे, असे काणकोणातील गुळे (गुडी) येथील हॉटेल मालक कामत यांनी सांगितले.
कामत पुढे म्हणाले की, व्यावसायिक गॅसच्या कमतरतेमुळे पारंपरिक पद्धतीने लाकडावर स्वयंपाक करण्यास सुरुवात केली आहे. काणकोण तालुक्यातील झुडपांमध्ये सहज उपलब्ध होणाऱ्या लाकडाचा वापर करून स्वयंपाक केला जात आहे. ही पद्धत कष्टदायक असली तरी, या प्रकारे बनवलेले अन्न अधिक चविष्ट लागते. त्यांच्या हॉटेलमध्ये दररोज किमान १०० वाट्या (ताटे) ‘कुंजी’ (स्थानिक भाषेत पेज) विकल्या जातात आणि तालुक्याच्या कानाकोपऱ्यातून लोक या पदार्थाचा आस्वाद घेण्यासाठी येतात. उष्ण हवामानात हा पदार्थ किफायतशीर, पौष्टिक आणि चविष्ट असल्याने ग्राहकांची पसंती मिळत असल्याचे त्यांनी सांगितले.
गॅसची ही टंचाई जागतिक पुरवठा साखळीतील अडचणींमुळे, विशेषतः पश्चिम आशियातील संघर्षांमुळे निर्माण झाली आहे. एलपीजी टँकरच्या आगमनात अडथळे येत आहेत. यामुळे अनेक हॉटेल्स सध्या केवळ ५० टक्के क्षमतेने कार्यरत आहेत, तर काही आस्थापने मार्चच्या सुरुवातीपासून सिलेंडरचा पुरवठा पूर्णपणे ठप्प झाल्याने बंद पडण्याच्या मार्गावर आहेत.
मोठ्या स्वयंपाकघरांसाठी इंडक्शन किंवा इतर पर्यायी साधनांकडे वळणे अवघड ठरत असून, त्यामुळे काणकोणमध्ये गंभीर परिस्थिती निर्माण झाली आहे. काणकोण हे महत्त्वाचे पर्यटनस्थळ असून, किनारपट्टीवरील सुमारे ९० टक्के लोकांचा उदरनिर्वाह पर्यटन आणि हॉटेल व्यवसायावर अवलंबून आहे. त्यामुळे गॅस टंचाईची समस्या तातडीने सोडवली नाही, तर स्थानिक पर्यटन अर्थव्यवस्थेवर, कामगारांच्या उत्पन्नावर परिणाम होण्याची शक्यता आहे.
२० टक्के पुरवठा करण्याचे आश्वासन देण्यात आले असले तरी, प्रत्यक्षात पुरवठा अत्यंत नगण्य असल्याची तक्रार हॉटेल व्यावसायिक करत आहेत. अनेकांना तर व्यावसायिक गॅस सिलेंडर मिळणेही कठीण झाले आहे, असे हॉटेल मालक संतोष गायक यांनी सांगितले.
