वाचा कॉर्पोरेट जगातील झगमगाट सोडून मनःशांतीचा शोध घेणाऱ्या एका तरुणाची सोशल मीडियावरील व्हायरल कहाणी...
मुंबई: आजच्या धावपळीच्या युगात प्रत्येक जण मोठ्या पगाराच्या आणि आलिशान आयुष्याच्या मागे धावत आहे. मात्र, वर्षाला तब्बल ४२ लाख रुपये कमवणारा एक तरुण जेव्हा केवळ ‘मनःशांती’ मिळवण्यासाठी आणि ‘आत्मसन्मान’ राखण्यासाठी आपली नोकरी सोडतो, तेव्हा ती गोष्ट चर्चेचा विषय ठरते. शिवम लखनपाल नावाच्या एका तरुणाने आपल्या उच्च पगाराच्या नोकरीचा राजीनामा दिल्यानंतर मांडलेली भूमिका सध्या सोशल मीडियावर मोठ्या प्रमाणात व्हायरल होत असून, ती अनेकांच्या काळजाला भिडत आहे.
शिवम लखनपाल याने नुकताच एक व्हिडिओ शेअर करून आपल्या कॉर्पोरेट आयुष्यातील कटू अनुभव मांडले आहेत. तो सांगतो की, वर्षाला ४२ लाख रुपयांचे घसघशीत पॅकेज मिळत असूनही तो आतून आनंदी नव्हता. त्या मोठ्या पगारासोबतच त्याच्या मनात प्रचंड असुरक्षितता आणि स्वतःबद्दल शंका निर्माण झाली होती. नोकरीत असताना त्याला सतत आपण कोणावर तरी अवलंबून आहोत किंवा ‘लाचार’ आहोत असे वाटत असे. श्रीमंती असूनही ही भावना त्याला अस्वस्थ करत होती.
एका प्रसंगाचे वर्णन करताना शिवम म्हणतो की, नोकरीत असताना त्याने १८ लाख रुपयांची एक महागडी गाडी खरेदी केली होती. पण जेव्हा तो पहिल्यांदा त्या गाडीत बसला, तेव्हा त्याला स्वतःबद्दल अभिमान वाटण्याऐवजी आपण या गाडीच्या लायकीचेच नाही, असे वाटले. स्वतःच्या कष्टाच्या पैशातून घेतलेली गाडी चालवताना देखील त्याला आत्मविश्वास जाणवत नव्हता. ही त्याची मानसिक अवस्था कॉर्पोरेट दबावाच्या परिणामस्वरूप बनली होती असे तो सांगतो.
नोकरी सोडल्यानंतर शिवम आता एक स्टँडअप कॉमिक आणि रॅपर म्हणून काम करत आहे. तो सांगतो की, आता त्याच्या बँक खात्यात नियमितपणे पैसे येत नाहीत, तरीही त्याला पूर्वी कधीही नव्हता इतका आत्मविश्वास आणि स्वातंत्र्य जाणवत आहे. नोकरीत असताना गायब झालेला त्याचा आनंद आता त्याच्या चेहऱ्यावर स्पष्ट दिसतो. ज्या गाडीत बसताना त्याला अस्वस्थ वाटायचे, तीच गाडी आता तो आनंदाने चालवतो. माणसाची श्रीमंती ही त्याच्या पैशावरून ठरत नाही, असे त्याचे ठाम मत आहे.
शिवमाच्या या निर्णयावर सोशल मीडियावर संमिश्र प्रतिक्रिया उमटत आहेत. अनेकांनी त्याच्या धाडसाचे कौतुक केले असून, मानसिक आरोग्य आणि स्वातंत्र्याला महत्त्व दिल्याबद्दल त्याला पाठिंबा दिला आहे. मात्र, काही जणांनी सावधगिरीचा इशाराही दिला आहे की, अशा प्रकारे नोकरी सोडणे सर्वांनाच परवडणारे नसते आणि आर्थिक जबाबदाऱ्यांकडे दुर्लक्ष करून चालत नाही. तरीही, पैशांच्या पलीकडे जाऊन स्वतःच्या अस्तित्वाचा विचार करणाऱ्या शिवमाची ही गोष्ट आजच्या तणावग्रस्त वातावरणात राहणाऱ्या तरुण पिढीला विचार करायला लावणारी ठरत आहे.
