स्पर्धेत १५ नाटकांचा सहभाग : ‘काणी तशी जुनीच..पुण’ दुसरे, तर ‘अस्तुरी’ तिसरे
‘हिडोनिस्ट’ नाटकातील कलाकारांना बक्षीस प्रदान करताना सुलक्षणा सावंत. सोबत दत्ताराम चिमुलकर, डॉ. पूर्णानंद च्यारी, श्रीधर कामत बांबोळकर, झिलू गावकर, प्रकाश वजरीकर इतर.
साखळी : रवींद्र भवन, साखळी व गोवा कोकणी अकादमी यांच्या संयुक्त विद्यमाने रवींद्र भवन येथे आयोजित करण्यात आलेल्या पहिल्या सत्तरी व डिचोली तालुका पातळीवर कोकणी नाट्य स्पर्धेत पहिले बक्षीस नाट्यरंग क्रिएशन नार्वेच्या ‘हिडोनिस्ट’ या नाटकाने पटकावले. स्पर्धेतील दुसरे बक्षीस श्री सातेरी कला मंच सत्तरी यांच्या ‘काणी तशी जुनीच.. पुण’ याला, तर तिसरे बक्षीस भूमी प्रकाशन सावर्शे सत्तरी यांच्या ‘अस्तुरी’ या नाटकाने पटकावले. या स्पर्धेचे उत्तेजनार्थ बक्षीस श्री निरंकारी कला मंच, बांबर यांच्या ‘काळमाया’ या नाटकाला प्राप्त झाले.
या नाट्य स्पर्धेत उत्कृष्ट दिग्दर्शनासाठी पहिले बक्षीस नितीन शिवराम नाईक (हिडोनिस्ट), दुसरे शाबलो गावकर (काणी तशी जुनीच.. पुण), तिसरे संपदा गावस (अस्तुरी) यांना प्राप्त झाले. उत्कृष्ट पुरुष कलाकार वैयक्तिक अभिनयासाठी पहिले बक्षीस रामा गावस (आदमिनीसत्रादोर/मिरांद, होमखण) दुसरे मिलिंद बर्वे (महेंद्र, हिडोनिस्ट), उत्कृष्ट स्त्री कलाकार वैयक्तिक अभिनयासाठी पहिले बक्षीस चैती कडकडे (मीना, हिडोनिस्ट), दुसरे दिव्या गावस (सासाय, काणी तशी जुनीच..). उत्कृष्ट रंगमंच व्यवस्था पहिले बक्षीस महादेव बोर्डेकर (काणी तशी जुनीच..). उत्कृष्ट प्रकाश योजनेसाठी पहिले बक्षीस उमेश कारबोटकर (हिडोनिस्ट). उत्कृष्ट वेशभूषेसाठी पहिले बक्षीस प्रज्योत माळशेकर (काळमाया). उत्कृष्ट रंगभूषेसाठी पहिले बक्षीस अंकुश ओझरेकर (काळमाया). उत्कृष्ट पार्श्वसंगीतासाठी पहिले बक्षीस गौतम गावस (काणी तशी जुनीच..). उत्कृष्ट लेखनासाठी पहिले बक्षीस डॉ. प्रकाश वजरीकर (भविष्यपुराण) यांना प्राप्त झाले. रवींद्र भवन साखळीच्या मुख्य सभागृहात झालेल्या बक्षीस वितरण सोहळ्याला पद्मिनी फाउंडेशनच्या अध्यक्षा सुलक्षणा सावंत, कोकणी नाट्य संगीत अकादमीचे अध्यक्ष श्रीधर कामत बांबोळकर, गोवा कोकणी अकादमीचे अध्यक्ष डॉ. पूर्णानंद च्यारी आणि रवींद्र भवनचे उपाध्यक्ष दत्ताराम चिमुलकर यांच्यासह अनेक मान्यवर उपस्थित होते. स्पर्धेत एकूण १५ कोकणी नाटके सादर करण्यात आली.
अशा स्पर्धांमुळे गावागावांतील युवा कलाकारांना व्यावसायिक नाटकात प्रवेशासाठी व्यासपीठ मिळते. नाट्यकलेच्या माध्यमातून गावची संस्कृती आणि परंपरा जपली जाते, असे सुलक्षणा सावंत म्हणाल्या. श्रीधर कामत बांबोळकर यांनी स्पर्धेतील नाटकांचा दर्जा उत्कृष्ट असल्याचे नमूद केले.
रवींद्र भवनचे उपाध्यक्ष दत्ताराम चिमुलकर यांनी रवींद्र भवन हे गावागावांत पोहोचावे आणि लहानातील लहान कलाकार या व्यासपीठावर यावा यासाठी सातत्याने प्रयत्न सुरू असल्याचे सांगितले. डॉ. पूर्णानंद च्यारी यांनी पहिल्याच स्पर्धेला चांगला प्रतिसाद लाभल्याबद्दल समाधान व्यक्त केले. या स्पर्धेचे परीक्षण श्रीधर कामत बांबोळकर, अशोक नाईक आणि हिरू नाईक यांनी केले.
आकाश चौकोळकर, मनीषा परब यांना विशेष प्रमाणपत्र
या स्पर्धेत पुरुष अभिनयासाठी आकाश चौकोळकर (मेळकार नायक), गौतम गोवेकर (रवळू), राम ओझरेकर (जत म्हणपी), वैभव सावळे (घोवयो), संघर्ष वळवईकर (प्रजय), सिद्धेश गावस (रंगाचार्य), संदीप किंजवडेकर (सिकंदर). तर स्त्रीपात्र अभिनयासाठी मनीषा परब (अस्तुरी), आरती माटणेकर (व्हडली), मारिटा डिसोजा (सानविका), डॉ. श्रुती सावंत (डॉ. शमी प्रियोळकर), तृप्ती रेडकर (आबोली), सीमा गावस (नक्षलवादी मुलगी) या कलाकारांना विशेष प्रमाणपत्र देऊन गौरविण्यात आले.
