जिल्हा पंचायत निवडणुकीसाठी युतीचा निर्णय पुढील दोन दिवसांत

मडगाव: आगामी जिल्हा पंचायत निवडणुकांसाठी विरोधी पक्षांकडून एकजूट ठेवण्याचे प्रयत्न सुरू असून, गोवा फॉरवर्ड आणि रिव्हॉल्युशनरी गोवन्स या पक्षांसोबत युती करण्याच्या दृष्टीने चर्चा सुरू आहेत. जागा वाटपावरील चर्चेअंती पुढील दोन दिवसांत युतीबाबतचा अंतिम निर्णय होईल, अशी माहिती काँग्रेसचे केपेचे आमदार एल्टन डिकॉस्टा यांनी दिली. काँग्रेस पक्ष जास्त जागा मिळवण्यासाठी आग्रही असून, युतीमधील सर्व घटकांना विश्वासात घेऊन जागावाटपाचा निर्णय घेतला जाईल, असेही त्यांनी स्पष्ट केले.

राज्यातील जिल्हा पंचायत निवडणुकांच्या पार्श्वभूमीवर बोलताना आमदार डिकॉस्टा यांनी विरोधी पक्षांकडून प्रभावी काम केले जात असल्याचे सांगितले. विरोधी पक्षांची एकी राहावी आणि युती करून निवडणुका लढवाव्या या उद्देशाने गोवा फॉरवर्ड पक्ष आणि रिव्हॉल्युशनरी गोवन्स पक्षासोबत चर्चा सुरू आहेत. काँग्रेस हा अनेक वर्षांपासूनचा पक्ष असल्यामुळे पक्षाने जास्तीत जास्त जागा लढवाव्यात, अशी आमची इच्छा आहे. सत्ताधारी भाजपला हरवण्यासाठी विरोधी पक्षांना विश्वासात घेऊन काँग्रेसकडून चांगले उमेदवार जिल्हा पंचायत निवडणुकीसाठी देण्याचे प्रयत्न सुरू आहेत, असे डिकॉस्टा यांनी नमूद केले.

सत्ताधारी पक्षावर गंभीर आरोप

यावेळी आमदार एल्टन डिकॉस्टा यांनी सत्ताधारी पक्षावर आचारसंहितेचे उल्लंघन केल्याचा आरोप केला. आचारसंहिता लागू झालेली असतानाही बेतूल येथे क्रिडा मंत्र्यांच्या उपस्थितीत क्रिडा साहित्याचे वाटप करण्यात आल्याची माहिती आपल्याला मिळाल्याचे ते म्हणाले.

तसेच, त्यांनी माजी आमदारांवरही टीका केली. माजी आमदार तब्बल २३ वर्षांनी आता जागे होऊन क्रिडा साहित्याचे वाटप करत आहेत. मात्र, त्यांनी इतक्या वर्षांत खेळण्यासाठी एकही मैदान विकसित केले नाही. याउलट, आपण पुढाकार घेऊन दोन मैदाने तयार केल्याचे डिकॉस्टा यांनी सांगितले.

याव्यतिरिक्त, खेळावेळी मनोरंजनासाठी खेळल्या जाणाऱ्या 'हाऊझी' (Housie) बंद करण्यासाठी आणि स्पर्धा रोखण्यासाठी काहीजणांकडून तक्रारी करून पोलीस पाठवले जातात. वाढदिवसाच्या दिवशी मद्य ठेवले नव्हते, त्याचेही राजकारण करण्याचा प्रयत्न होणे हे योग्य राजकारण नाही. त्यामुळे जिल्हा पंचायत निवडणुकीत मतदार योग्य तो निर्णय घेतील, असा विश्वास आमदार एल्टन डिकॉस्टा यांनी व्यक्त केला.