२.२० लाख मतदारांचे 'मॅपिंग' झालेले नाही; सुनावणीनंतर होईल अंतिम निर्णय : मुख्य निवडणूक अधिकारी
पणजी: गोव्यातील मतदारांच्या विशेष सखोल फेरतपासणीअंतर्गत आतापर्यंत १०.५५ लाख (९६.५ टक्के) मतदारांचे 'एन्युमरेशन फॉर्म' (जनगणना फॉर्म) संकलित झाले आहेत. सुमारे ९० हजार मतदारांचे फॉर्म अद्याप परत आलेले नाहीत आणि अशा मतदारांची नावे मसुदा यादीत समाविष्ट केली जाणार नाहीत. तसेच, सुमारे २.२० लाख मतदारांचे अथवा त्यांच्या आई-वडिलांचे नाव २००२ च्या मतदार यादीत नाही. 'मॅपिंग' न झालेल्या या मतदारांबाबत सुनावणी घेऊन अंतिम निर्णय घेण्यात येईल, अशी माहिती मुख्य निवडणूक अधिकारी संजय गोयल यांनी दिली.
रविवारी पणजीत झालेल्या पत्रकार परिषदेत गोयल यांनी ही माहिती दिली. फॉर्म परत न आलेल्या ९० हजार मतदारांचा 'एएसडीडी' (ASDD - Absent, Shifted, Dead, Duplicate) या श्रेणीत समावेश करण्यात आला आहे. यामध्ये मृत, अनुपस्थित, दुहेरी नाव असलेले अथवा पत्ता बदललेले मतदार समाविष्ट आहेत. ९ डिसेंबर रोजी जारी होणाऱ्या मसुदा यादीत त्यांची नावे नसतील.
अशा मतदारांची नावे ऑनलाईन आणि ऑफलाईन पद्धतीने जाहीर केली जातील. यातील कोणत्याही मतदाराला आपले नाव चुकीच्या पद्धतीने काढले आहे असे वाटत असल्यास, त्यांनी ७ फेब्रुवारीपूर्वी 'अर्ज ६' भरून देणे आवश्यक आहे. अशा व्यक्तींना घोषणापत्रही सादर करावे लागेल. सर्व कागदपत्रे योग्य आढळल्यास, या व्यक्तींची नावे अंतिम मतदार यादीत समाविष्ट केली जातील.
राज्यात यापूर्वी २००२ मध्ये एसआयआर करण्यात आले होते. २००२ आणि २०२५ च्या मतदार याद्यांची पडताळणी केली असता, सुमारे २.२० लाख मतदारांचे मॅपिंग झालेले नाही. याचाच अर्थ, या २.२० लाख मतदारांचे किंवा त्यांच्या आई अथवा वडिलांचे नाव २००२ च्या मतदार यादीत नाही. या सर्व लोकांचे नाव मसुदा यादीत येईल, मात्र त्यांना नोटीस पाठवण्यात येतील. त्यांना आपले नाव पूर्वी होते हे सिद्ध करावे लागेल. यासाठी सुनावणी घेऊन अंतिम निर्णय घेतला जाईल.
राज्यातील एकूण ११.८५ लाख मतदारांपैकी १०.५५ लाख जणांची एन्युमरेशन फॉर्म संकलित झाले आहेत. यातील २.२० लाख जणांचे मॅपिंग झाले नाही. फेरतपासणीत सुमारे ९० हजार एएसडीडी मतदार आढळले. यात २३ हजार ८०० मृत, ३५ हजार ७०० जणांचा पत्ता बदलला, २३ हजार ८०० जण फेरतपासणी वेळी अनुपस्थित होते तर १,७८७ जणांचे दुहेरी मतदान आढळले.
गोयल यांनी स्पष्ट केले की, मॅपिंग झाले नसले तरी या २.२० लाख मतदारांना जिल्हा पंचायत निवडणुकीत मतदान करता येणार आहे. मात्र, यासाठी त्यांचे नाव जिल्हा पंचायतीच्या मतदार यादीत असणे आवश्यक आहे.
